उपराष्ट्रपति जगदीप धनखड़ कह्यो है के आतंकवाद दुनिया सारू चिंता रो मुद्दो है। वे कह्यो के भारत रा हिफ़ाज़ती दस्ता आतंकवाद रो मुंहतोड़ जवाब दीनो। श्री धनखड़ गुरूवार ने पैली वाळा उपराष्ट्रपति भैरोंसिंह शेखावत री पुण्यतिथि रे मौके जयपुर मांय राख्यी ज्या कार्यक्रम मांय बोल रह्या हा। वे देश री हिफ़ाज़त करण वाळा फौजियां रो धन्यवाद कीनो। श्री धनखड़ कह्यो के भारत री फौज विश्व स्तर माथे नुवा मानदंड स्थापित कीना है। कार्यक्रम मांय उपराष्ट्रपति कह्यो के भारत वां री ताकत बतावण सारू जद पोकरण मांय दूजी दफा परमाणु परीक्षण कीनो, वां बगत भैरों सिंह शेखावत राजस्थान रा मुख्यमंत्री हा। श्री धनखड़ कह्यो के देश रा विकास मांय बाबोसा रो योगदान हमेशा याद राख्यो जावेला। उपराष्ट्रपति भैरों सिंह शेखावत स्मारक पुस्तकालय रो उद्घाटन ई कीनो। कार्यक्रम मांय राज्यपाल हरिभाऊ बागड़े, केन्द्रीय मंत्री गजेंद्र सिंह शेखावत अर उपमुख्यमंत्री डॉ. प्रेमचंद बैरवा समेत केई मान्योड़ा लोग मौजूद रह्या। इण ऊं पैली गुरूवार संवारे मुख्यमंत्री भजनलाल शर्मा जयपुर रा विद्याधर नगर मांय भैरोंसिंह शेखावत री समाधि माथे सिरधा रा फूल चढ़ाया। वे बाबोसा ने याद करता थकां कह्यो के सियात मांय कर्तव्यनिष्ठा, नैतिकता अर जनसेवा रा आदर्श प्रतिमान शेखावत री देश रा भला अर जनता रा कल्याण सारू समर्पित जिन्दगी सगळां ने सीख देवे है।