मुख्यमंत्री भजनलाल शर्मा ज़रूरतमंद लोगां ऊं अंत्योदय संबल पखवाड़ा रा तैत नाम मंडावण री अपील कीनी है। सोमवार ने वां रा रेहवास माथे जनसुणवाई रे दौरान श्री शर्मा कह्यो के अंत्योदय संबल पखवाड़ा रे जरिए सुबीतां ऊं महरूम लोगां ने सरकार कानी ऊं चलायी जा रही जनता रा भला री योजनावां रो फायदो दिरायो जावेला। प्रदेशभर मांय मंगलवार ऊं पंडित दीनदयाल उपाध्याय अन्त्योदय सम्बल पखवाड़ो मणायो जावेला। कैबिनेट मंत्री जोगाराम पटेल सोमवार ने जोधपुर जिला री लूणी पंचायत समिति मांय ईं पखवाड़ा री तैयारियां रो जायजो लीनो। ईं मौके वे कह्यो के 9 जुलाई तांई चालण वाळा ईं पखवाड़ा रे दौरान हर तहसील मांय रोजीना 2 ऊं 3 शिविर लगाया जावेला अर ईं सागे ई हर ग्राम पंचायत मांय ई शिविर लगाया जावेला। समाज मांय सुबीतां रा लिहाज़ ऊं आखिरी ठोड़ रा लोगां ने सुबीता मुहैया करावण रा लक्ष्य सागे गरीबी मुक्त गांव योजना चलायी ज्यी है। ईं रा पैला दौर रा तैत 5 हजार गांवां मांय गरीबी री लकीर ऊं नीचे जीवण वाळां ने गरीबी रेखा ऊं ऊंचा उठाया जावेला।