अंतर्राष्ट्रीय योग दिवस रे मौके थावर ने पूरी दुनिया मांय एक पृथ्वी-एक स्वास्थ्य रो संदेश गूंजो अर करोड़ां लोग योग रे मार्फत इण रा महत्त्व ने और मज़बूत कीनो। योग दिवस रे मौके 175 देशां मांय लोग योगासन कर र इण ने स्वस्थ अर संतुलित जीवन रो असरदार जरियो बतायो। 11वें अंतर्राष्ट्रीय योग दिवस रे मौके विशाखापत्तनम मांय राख्यी ज्या जळसा मांय प्रधानमंत्री नरेन्द्र मोदी ई शिरकत कीनी। वे योग ने शांति री दिशा बताता थकां विश्व समुदाय ऊं ईं दिन ने योग 2.0 री सरूआत रा तौर ऊं मनावण री अपील कीनी।
योग दिवस रे मौके देशभर मांय सैर-सपाटा री ठौड़ां, स्मारकां, महलां, किलां, बाग-बगीचां, स्टेडियम, दफ्तरां अर स्कूल-कॉलेजां मांय सामूहिक योगाभ्यास रा कार्यक्रम राख्यी ज्या। राष्ट्रपति द्रौपदी मुर्मू देहरादून मांय राख्यी ज्या योग शिविर मांय शिरकत कीनी। ईं मौके वे योग ने बधावो देवण मांय भारत रा काम ने खास बतायो।
लोकसभा अध्यक्ष ओम बिरला संसद परिसर मांय राख्यी ज्या योग दिवस कार्यक्रम मांय शिरकत कीनी। वे कह्यो के योग इंसान रा पूरा विकास मांय खास काम करे है। योग दिवस रे मौके थावर ने पूरो प्रदेश योगमय निजर आयो। जैसलमेर ज़िला मांय खुहड़ी रा रेतीला धोरां मांय राख्यी ज्या राज्य स्तर रा जळसा मांय मुख्यमंत्री भजनलाल शर्मा कह्यो के पूरी दुनिया योग ने अपना र भारत री ईं जूनी रीत रो मान बधायो है। वे कह्यो के योग शरीर अर मन रो स्वास्थ्य अर समरसता रो प्रतीक है।
जयपुर रा सवाईमानसिंह स्टेडियम मांय राख्यी ज्या कार्यक्रम मांय राज्यपाल हरिभाऊ बागड़े समेत मोटी तादाद मांय जन समुदाय भागीदारी कीनी। योग दिवस रे मौके प्रदेश रा सगळा ज़िलां मांय खास जळसा राख र योग रे ज़रिए स्वस्थ जीवन शैली माथे ज़ोर दियो ज्यो। ब्लॉक स्तर अर ग्राम पंचायतां मांय ई स्कूल-कॉलेज, स्टेडियम अर पार्कां मांय संवारे ऊं ईं लोगां रे पूगण रो सिलसिलो सरू व्हे ग्यो। योग री सिखावण देवण वाळां री अगुवाई मांय न्यारा-न्यारा योगासनां रे ज़रिए स्वस्थ रेहवण रो संदेश दियो ज्यो।