अंतर्राष्ट्रीय योग दिवस रा सिलसिला मांय नई दिल्ली रा मोरारजी देसाई राष्ट्रीय योग संस्थान मांय मंगलवार ने योग बंधन कार्यक्रम राख्यी ज्यो। कार्यक्रम मांय डेनमार्क, इंडोनेशिया, मलेशिया, दक्षिण कोरिया अर अर्जेंटीना समेत न्यारा-न्यारा देशा रा नुमाइन्दा सिरकत कीनी। ओ ईं साल योग दिवस रा सिलसिला मांय राख्यी ज्या दस खास कार्यक्रमां मांय शामिल है। ईं मौके आयुष मंत्रालय रा सचिव वैद्य राजेश कोटेचा कह्यो के न्यारा-न्यारा देशा रा अ नुमाइन्दा भारत री पांच दिन री यात्रा रे दौरान अंतर्राष्ट्रीय योग दिवस रा जळसा व्हेवण री खास ठौड़ां रो दौरो ई करेला। प्रदेश मांय ई योग शिविर अर सामूहिक योगाभ्यास कार्यक्रम लगातार चाल रह्या है। मंगलवार ने जयपुर मांय मुख्यमंत्री रा रहवास माथे विशेष योग सत्र राख्यी ज्यो। इण मांय मुख्यमंत्री भजन लाल शर्मा विद्यार्थियां अर सुरक्षा कर्मचारियां सागे योगाभ्यास कीनो। अजमेर, पाली और झालावाड़ मांय ई अंतर्राष्ट्रीय योग दिवस काउंटडाउन रा तैत न्यारी-न्यारी ठौड़ां योगाभ्यास रा कार्यक्रम राख्यी ज्या। सरहदी ज़िला जैसलमेर ऊं म्हाणा खबरनवीस बतायो के बी.एस.एफ. रा जवान रेतीले धोरां माथे योगासन कीना।