राष्ट्रपती द्रौपदी मुर्मू यांनी आज पोर्तुगालचे राष्ट्राध्यक्ष मार्सेलो रेबेलो डी सौसा यांची भेट घेऊन शिष्टमंडळस्तरीय चर्चा केली. त्यानंतर प्रसिद्ध केलेल्या संयुक्त निवेदनात राष्ट्रपती म्हणाल्या, की भारत आणि पोर्तुगाल दरम्यानचे नाते संबंध ऐतिहासिक असून आता ते अधिक आधुनिक आणि बहुआयामी झाले आहेत. पोर्तुगालच्या राष्ट्राध्यक्षांबरोबर विविध विषयांवर सविस्तर आणि विधायक चर्चा झाल्याचं त्यांनी सांगितलं.
या बैठकी पूर्वी मुर्मू यांनी पोर्तुगालचे राष्ट्रकवी लुई वाझ डी कामोस यांच्या समाधीस्थळी जाऊन आदरांजली वाहिली. राष्ट्रपती आज पोर्तुगालचे प्रधानमंत्री लुई मॉन्टेनेग्रो आणि संसदेचे सभापती जोस पेद्रो अग्वार ब्रांको यांचीही भेट घेणार आहेत. लिस्बनच्या महापौरांनी भारताच्या राष्ट्रपतींच्या सन्मानार्थ विशेष कार्यक्रम आयोजित केला आहे.
पोर्तुगालमधल्या भारतीय समुदायाशी मुर्मू संवाद साधतील, विशेषतः तिथल्या विद्यापीठ आणि शैक्षणिक संस्थांमधल्या भारतीय संशोधक आणि अभ्यासकांनाही त्या भेटतील. २७ वर्षांनंतर प्रथमच भारताचे राष्ट्रपती पोर्तुगालला भेट देत असून भारत – पोर्तुगाल राजनैतिक संबंधांना यंदा ५० वर्ष पूर्ण होत आहेत. त्यानिमित्त एका विशेष टपाल तिकिटीचं प्रकाशन मुर्मू यांच्या हस्ते होणार आहे. येत्या बुधवारी आणि गुरुवारी राष्ट्रपती स्लोव्हाकियाच्या दौऱ्यावर असतील. भारताच्या राष्ट्रपतींची स्लोव्हकियाला २९ वर्षांनंतर पहिलीच भेट असेल.