રાજ્યમાં 24 કલાક સુધી મહત્તમ તાપમાનમાં ફેરફારની સંભાવના નહીંવત્ છે તેમ હવામાન વિભાગે જણાવ્યું છે. સત્તાવાર યાદી મુજબ, 24 કલાક બાદ મહત્તમ તાપમાન બેથી ત્રણ ડિગ્રી સેલ્સિયસ વધી શકે છે. જ્યારે આગામી સાત દિવસ રાજ્ય અને સૌરાષ્ટ્ર-કચ્છમાં મહત્તમ તાપમાન 40થી 44 ડિગ્રી સેલ્સિયસ વચ્ચે રહેવાની સંભાવના છે.ગત 24 કલાકમાં રાજ્યમાં સૌથી વધુ 44 ડિગ્રી સેલ્સિયસ મહત્તમ તાપમાન રાજકોટમાં નોંધાયું. જ્યારે અમરેલી, કંડલા હવાઈમથક અને સુરેન્દ્રનગરમાં 43 ડિગ્રી તો, ભુજમાં 42 અને અમદાવાદ, બનાસકાંઠાના ડીસા તેમજ ગાંધીનગરમાં મહત્તમ તાપમાન 41 ડિગ્રી સેલ્સિયસ રહ્યું હતું. આ સિવાયના જિલ્લાઓ અને શહેરોમાં મહત્તમ તાપમાન 40 ડિગ્રી અને તેનાથી ઓછું નોંધાયું છે.