પ્રધાનમંત્રી નરેન્દ્ર મોદીએ ઐતિહાસિક ગાઝા શાંતિ પહેલની સફળતા બદલ ઇઝરાયલના પ્રધાનમંત્રી બેન્જામિન નેતન્યાહૂ અને અમેરિકાના રાષ્ટ્રપતિ ડોનાલ્ડ ટ્રમ્પને અભિનંદન પાઠવ્યા છે. ગઈકાલે રાત્રે શ્રી નેતન્યાહૂ સાથે ફોન પર વાતચીતમાં પ્રધાનમંત્રી મોદીએ આ પહેલ હેઠળ થયેલી પ્રગતિની પ્રશંસા કરી. શ્રી મોદીએ ખાસ કરીને બંધકોને મુક્ત કરવા અને ગાઝાના લોકોને માનવતાવાદી સહાય પૂરી પાડવાના કરારનું સ્વાગત કર્યું. સોશિયલ મીડિયા પોસ્ટમાં શ્રી નેતન્યાહૂ સાથેની તેમની વાતચીતની વિગતો શેર કરતા, પ્રધાનમંત્રી મોદીએ આતંકવાદ સામે ભારતના મક્કમ વલણને ફરીથી સમર્થન આપ્યું
બીજી પોસ્ટમાં, પ્રધાનમંત્રી મોદીએ રાષ્ટ્રપતિ ટ્રમ્પ સાથેની તેમની ફોન પર વાતચીતની વિગતો શેર કરી. પ્રધાનમંત્રીએ ઐતિહાસિક ગાઝા શાંતિ પહેલની સફળતા બદલ શ્રી ટ્રમ્પને અભિનંદન આપ્યા. બંને નેતાઓએ ભારત અને અમેરિકા વચ્ચે ચાલી રહેલી વેપાર વાટાઘાટોમાં સકારાત્મક પ્રગતિની પણ સમીક્ષા કરી.
શ્રી મોદીએ ગાઝામાં દુશ્મનાવટનો અંત લાવવા માટે ટ્રમ્પ અને નેતન્યાહૂના પ્રયાસોની પ્રશંસા કરી હતી. તેમણે આશા વ્યક્ત કરી કે બંધકોની મુક્તિ અને ગાઝાના લોકોને માનવતાવાદી સહાયમાં વધારો કાયમી શાંતિનો માર્ગ મોકળો કરશે.
અમેરિકાએ ગાઝા શાંતિ યોજનાના પ્રથમ તબક્કા પર ઇઝરાયલ અને હમાસ વચ્ચે કરારની જાહેરાત કરી. શાંતિ યોજના હેઠળ, હમાસ ગાઝા પટ્ટીમાં રાખવામાં આવેલા તમામ બંધકોને મુક્ત કરશે અને પ્રદેશનું બિનલશ્કરીકરણ કરશે.
ગઈકાલે મુંબઈમાં પ્રધાનમંત્રી મોદી અને બ્રિટિશ પ્રધાનમંત્રી કીર સ્ટાર્મર વચ્ચે થયેલી વાતચીત દરમિયાન પણ ગાઝાની પરિસ્થિતિ પર ચર્ચા કરવામાં આવી હતી