মকৰ সংক্ৰান্তি উপলক্ষে চাহ জনগোষ্ঠী বসতিপ্রধান অঞ্চলসমূহত আজি কৃষিভিত্তিক উৎসৱ টুচু পূজা উদযাপন কৰা হৈছে। এই উপলক্ষে উজনি অসমৰ বিভিন্ন চাহ বাগানসমূহৰ চাহ জনগোষ্ঠীসমূহৰ উপাস্য দেৱী টুচুৰ বাৰ্ষিক পূজা উলহ-মালহেৰে আয়োজন কৰে। গোলাঘাট জিলাৰ বোকাখাটৰ লতাবাৰীৰ আহোম গাঁৱৰ মুকলি পথাৰত চাহ জনগোষ্ঠীৰ লোকসকলে পাৰম্পৰিক খেল-ধেমালিৰ আয়োজন কৰে। এই উৎসৱত অংশগ্ৰহণ কৰিবলৈ শিৱসাগৰ, যোৰহাট, নগাঁও ইত্যাদি জিলাসমূহৰ অগণন লোক সমবেত হয়।
চাহ জনগোষ্ঠীৰ লোকসকলে মাঘ বিহুৰ দিনাই এই বিশেষ পূজাৰ আয়োজন কৰে। যুৱক-যুৱতী আৰু নৱ বিবাহিত দম্পতীয়ে এই পূজাত টুচু দেৱীক সাক্ষী কৰি আজীৱন সুখী যুৰীয়া জীৱনৰ কাৰণে প্ৰাৰ্থনা কৰে । পূজাত ঝুমুৰ নৃত্য-গীতৰ আয়োজন কৰা হয়। টুচু দেৱীক মনসা, দুৰ্গা আৰু সীতাৰ সৈতে ৰিজনী দি ডেকা-গাভৰুসকলে ঘৰে ঘৰে গৈ অৰিহনা সংগ্ৰহ কৰে ।