জিম্বাবুৱেৰ উপ-ৰাষ্ট্ৰপতি ড° চি.জি.ডি.এন. চিৱেংগাই কয়, যে আফ্রিকা আৰু ভাৰতে বহুত আগৰে পৰা এক ঐতিহাসিক সম্পৰ্ক ৰক্ষা কৰি আহিছে। তেওঁ উল্লেখ কৰে যে, দুয়োখন দেশৰ মাজত প্ৰযুক্তি, উদ্ভাৱন, বৈচিত্র্যতা আৰু আন্তঃগাঁথনি উন্নয়নৰ বাবে অংশীদাৰিত্বৰ বিষয়ত গুৰুত্ব আৰোপ কৰি অহা হৈছে। আজি নতুন দিল্লীত চিআইআই ইণ্ডিয়া-আফ্রিকা বাণিজ্য সন্মিলনত ভাষণ প্ৰদান কৰি ড° চিৱেংগাই কয়, যে ভাৰতৰ সৈতে ব্যৱসায় কৰিবৰ বাবে জিম্বাবোৱেৰ পথ সদায় মুকলি। তেওঁ কয় যে সদ্যহতে প্রধানতঃ মূল্য সৃষ্টিৰ ওপৰত গুৰুত্ব প্ৰদান কৰা হৈছে যাতে ভাৰত আৰু আফ্ৰিকা উভয়ৰে বাবে অর্থনৈতিক আৰু সামাজিক উত্থানৰ ক্ষেত্ৰত দীর্ঘম্যাদী অংশীদাৰিত্ব সৃষ্টি কৰিব পৰা বিষয়সমূহৰ ওপৰত গুৰুত্ব আৰোপ কৰিব পৰা যায়। দুয়োখন দেশৰ মাজৰ অংশীদাৰিত্বই উদ্ভাৱন, সামাজিকীকৰণ আৰু বৈচিত্ৰ্যতাৰ দিশত আগুৱাই যাবলৈ দুয়োখন দেশকে সহায় কৰিব। ভাষণ প্ৰদান কৰি কেন্দ্ৰীয় বৈদেশিক পৰিক্ৰমা বিভাগৰ ৰাজ্যিক মন্ত্রী কীর্তি বর্ধন সিঙে কয় যে, ভাৰত-আফ্ৰিকাৰ সহযোগিতাই দুয়োখন দেশতে দক্ষতা বিকাশ আৰু কর্মসংস্থাপনৰ সুযোগ সৃষ্টি কৰিব। তেওঁ লগতে কয় যে দুয়োটা অঞ্চলতে বিভিন্ন ডিজিটেল কেন্দ্ৰ স্থাপন কৰা হৈছে । ইয়াৰ লগে লগে ডিজিটেল সাক্ষৰতাৰ লগতে প্ৰযুক্তিৰ উত্থান আৰু উন্নতিৰ ক্ষেত্ৰত ডিজিটেল ৰূপান্তৰ অত্যন্ত প্রয়োজনীয় হৈ পৰিছে।