কেন্দ্রীয় উদ্যোগ মন্ত্রী পিয়ুষ গোৱেলে নতুন অৱধাৰণা আৰু উদ্ভাৱন গ্ৰহণ কৰি সমাজ আৰু দেশৰ আৱশ্যকতা পূৰণত অগ্ৰাধিকাৰ দিবলৈ ষ্টাৰ্টআপ প্ৰতিষ্ঠানসমূহৰ প্ৰতি আহ্বান জনাইছে। আহমেদাবাদত আজি ৱেজলপুৰ ষ্টাৰ্টআপ মহোৎসৱৰ দ্বিতীয় সংস্কৰণ মুকলি কৰি মন্ত্ৰীগৰাকীয়ে এইদৰে প্ৰকাশ কৰে। তেওঁ কয় যে ভাৰতবৰ্ষক বিকশিত ৰাষ্ট্ৰৰূপে গঢ়ি তোলাৰ পৰিকল্পনাক বাস্তৱায়িত কৰাৰ ক্ষেত্ৰত ষ্টার্টআপ প্রতিষ্ঠানসমূহে গুৰুত্বপূৰ্ণ ভূমিকা পালন কৰিব। তেওঁ লগতে দেশৰ ষ্টাৰ্টআপ প্রতিষ্ঠানসমূহলৈ সহায় সমৰ্থন আগবঢ়োৱাৰ উদ্দেশ্যে মোদী চৰকাৰে গ্ৰহণ কৰা ফাণ্ড অৱ ফাণ্ডছৰ লেখিয়া উদ্যমসমূহৰ বিষয়ে আলোকপাত কৰে। ৱেজলপুৰ ষ্টাৰ্টআপ মহোৎসৱৰ প্ৰশংসা কৰি মন্ত্ৰীগৰাকীয়ে কয় যে এনেধৰণৰ কাৰ্যসূচীয়ে ৰাষ্ট্ৰৰ বাবে নিদৰ্শন দাঙি ধৰে আৰু দেশত ষ্টাৰ্ট আপ অনুকূল ব্যৱস্থা সুদৃঢ় কৰাৰ বাবে বিভিন্ন প্ৰান্তত এনে ধৰণৰ মহোৎসৱ আয়োজন কৰাৰ আৱশ্যকতা আছে।