মুখ্যমন্ত্রী ড০ হিমন্ত বিশ্ব শৰ্মাই কালি গুৱাহাটীৰ খানাপাৰাৰ পশু চিকিৎসা বিজ্ঞান মহাবিদ্যালয় খেলপথাৰত আয়োজিত এটা অনুষ্ঠানত নিম্ন প্ৰাথমিক আৰু উচ্চ প্ৰাথমিক বিদ্যালয়ৰ শিক্ষক পদৰ বাবে বাছনিকৃত ৰাজ্যৰ ৫ হাজাৰ ৫৫০ গৰাকী টে’ট উত্তীর্ণ প্রার্থীক নিযুক্তিপত্র প্ৰদান কৰে। ইয়াৰে নিম্ন প্ৰাথমিক বিদ্যালয়ৰ ৩ হাজাৰ ৮০০ গৰাকী আৰু উচ্চ প্ৰাথমিক বিদ্যালয়ৰ এহেজাৰ ৭৫০ গৰাকী প্ৰাৰ্থীক নিযুক্তিপত্ৰ বিতৰণ কৰা হয়। মুখ্যমন্ত্ৰীয়ে এই অনুষ্ঠানতে শিক্ষক সমল পেকেজৰ অধীনত শিক্ষক-শিক্ষয়িত্ৰী সকলৰ মাজত ৮ হাজাৰ ৭৯৯টা টেবলেট বিতৰণ কৰে। তেওঁ লগতে ‘আৰোহণ আঁচনি’ৰ অধীনত ছাত্ৰ-ছাত্ৰীসকলক ৪ হাজাৰ ২৮০টা টেবলেট প্ৰদান কাৰ্যসূচীৰো শুভাৰম্ভ কৰে। অনুষ্ঠানত ভাষণ দি মুখ্যমন্ত্ৰী ড০ শৰ্মাই ৰাজ্য চৰকাৰে স্বচ্ছতাৰ ভিত্তিত নিযুক্তি প্ৰদানৰ ফলত বৰ্তমান যুৱক-যুৱতীসকলৰ মাজত নতুন প্ৰেৰণাৰ সৃষ্টি হৈছে বুলি মন্তব্য কৰে। তেওঁ কয়, যে এতিয়া চৰকাৰী খণ্ডত সংস্থাপন নোপোৱা যুৱক-যুৱতীসকলে ব্যক্তিগত খণ্ডত নিযুক্তি পাব পৰাৰ এটা পৰিবেশ ৰাজ্যত সৃষ্টি হৈছে।