আজি ৰাষ্ট্ৰীয় ক্রীড়া দিৱস। কিংবদন্তি হকী খেলুৱৈ মেজৰ ধ্যানচন্দৰ জন্মবার্ষিকীৰ লগত সংগতি ৰাখি প্ৰতি বছৰে ২৯ আগষ্টত এই দিৱস পালন কৰা হয়। অসমতো আজি দিনজোৰা কাৰ্যসূচীৰে ৰাষ্ট্ৰীয় ক্রীড়া দিৱস আয়োজন কৰা হৈছে।
হোজাই জিলা প্ৰশাসনৰ উদ্যোগত আজিৰে পৰা তিনিদিনীয়াকৈ ৰাষ্ট্ৰীয় ক্রীড়া দিৱস পালন কৰা হৈছে। ধেমাজি জিলাত ৰাষ্ট্ৰীয় ক্রীড়া দিৱসৰ লগত সংগতি ৰাখি আজি দহ কিলোমিটাৰ মাৰাথান দৌৰ প্রতিযোগিতা অনুষ্ঠিত হয়।
যোৰহাটৰ অসম কৃষি বিশ্ববিদ্যালয়ত আয়োজিত ৰাষ্ট্ৰীয় ক্রীড়া দিৱসৰ কাৰ্যসূচীত মেজৰ ধ্যানচন্দৰ প্ৰতি শ্রদ্ধাঞ্জলি জ্ঞাপন কৰাৰ লগতে তেওঁৰ খেলুৱৈ জীৱনৰ ওপৰত আলোকপাত কৰা হয়।
শোণিতপুৰ জিলাতো ৰাষ্ট্ৰীয় ক্রীড়া দিৱস উপলক্ষে জ্যেষ্ঠ নাগৰিকৰ মাজত ৱাকাথন, যোগাভ্যাস আৰু ডবা প্রতিযোগিতা অনুষ্ঠিত হয়।
কামৰূপ জিলা প্ৰশাসনৰ উদ্যোগত আজিৰে পৰা তিনিদিনীয়াকৈ ৰাষ্ট্ৰীয় ক্রীড়া দিৱস উদযাপনৰ দিহা কৰা হৈছে।
দৰং জিলাত ৰাষ্ট্ৰীয় ক্রীড়া দিৱস উপলক্ষে আজি মঙলদৈত বিভিন্ন পৰম্পৰাগত খেলৰ লগতে ডবা, কাবাড়ী, ফুটবল আৰু প্ৰবীন খেলুৱৈৰ মাজত ভলীবল খেলো অনুষ্ঠিত হয়।
গোৱালপাৰা জিলা প্ৰশাসনেও ৩ দিনীয়া কাৰ্যসূচীৰে ৰাষ্ট্ৰীয় ক্রীড়া দিৱস উদযাপন কৰিছে।
বৰপেটা জিলাৰ ৰামৰায় ষ্টেডিয়ামত ৰাষ্ট্ৰীয় ক্রীড়া দিৱস উপলক্ষে বিভিন্ন কাৰ্যসূচী পালন কৰা হয়। পশ্চিম কাৰ্বি আংলঙৰ হামৰেনস্থিত ৰংবং ৰংহাং খেলপথাৰতো ৰাষ্ট্ৰীয় ক্রীড়া দিৱস উদযাপন কৰা হয়। উল্লেখযোগ্য যে এই বছৰ ৰাষ্ট্ৰীয় ক্রীড়া দিৱসৰ মূল বিষয়বস্তু হৈছে – শান্তিপূৰ্ণ আৰু সৰ্বাত্মক সমাজৰ প্ৰসাৰৰ বাবে খেল-ধেমালি ।
