জনপ্রিয় সংগীতজ্ঞ, গীতিকাৰ, সুৰকাৰ, আকাশবাণী ডিব্ৰুগড় কেন্দ্ৰৰ অনুষ্ঠান উপস্থাপক চৈয়দ ছাদুল্লাৰ আজি গুৱাহাটী চিকিৎসা মহাবিদ্যালয়ত দেহাৱসান ঘটে। মৃত্যুৰ সময়ত তেওঁৰ বয়স হৈছিল ৭৭ বছৰ। তেওঁ কিছুদিন ধৰি শাৰীৰিকভাবে অসুস্থ হৈ আছিল। আকাশবাণী ডিব্ৰুগড়ত বাদ্যযন্ত্রী হিচাপে যোগদান কৰা চৈয়দ ছাদুল্লা কুইভাৰ্ছ নামৰ ৭০ দশকৰ সংগীত গোষ্ঠীৰ অন্যতম শিল্পী আছিল। ৮০ দশকত প্ৰচাৰিত আকাশবাণী ডিব্ৰুগড়ৰ ভিন্নৰঙী অনুষ্ঠান বর্ণালী মুনীন ভূঞাৰ সৈতে উপস্থাপন কৰি তেওঁ জনপ্রিয় হৈ পৰিছিল। পৰৱৰ্তী সময়ত শিল্পীগৰাকীয়ে গীত ৰচনা, সংগীত চৰ্চা আৰু সুৰকাৰ হিচাপে নিজকে প্রতিষ্ঠা কৰে। তেওঁ আকাশবাণীৰ নাট বিভাগৰ বি হাইগ্ৰেড আছিল আৰু তেওঁ ৰচনা কৰা কেইবাখনো নাটকে ৰাষ্ট্ৰীয় পৰ্যায়ৰ সন্মান বুটলিবলৈ সমর্থ হয়।