নাট্যনগৰী পাঠশালাত যোৱা ৩১ জানুৱাৰীৰ পৰা বৰ্ণাঢ্য কাৰ্যসূচীৰে অনুষ্ঠিত অসম সাহিত্য সভাৰ সপ্তসপ্ততিতম দ্বি-বার্ষিক অধিৱেশনৰ কালি সামৰণি পৰে। লক্ষ লক্ষ লোকৰ সমাগম হোৱা এই অধিৱেশনৰ গ্ৰন্থমেলাৰ চাৰিটা দিনত কমেও ৫ কোটি টকাৰ গ্ৰন্থ বিক্ৰীৰে অভিলেখ সৃষ্টি হোৱা বুলি উদ্যোক্তাসকলে প্ৰকাশ কৰিছে। এই অধিৱেশনত ৰাজ্যৰ বিভিন্ন প্ৰান্তৰ সাহিত্যানুৰাগীৰ লগতে উত্তৰ-পূৰ্বাঞ্চলৰ অন্যান্য ৰাজ্য আৰু ভূটান আৰু নেপালৰ সাহিত্যপ্রেমীও অংশগ্রহণ কৰে। তদুপৰি পাঠশালা সাহিত্য সভাত প্ৰথমবাৰৰ বাবে মুকলি কৰা বিজ্ঞান মেলাত অগণন লোকৰ সমাগম হোৱা পৰিলক্ষিত হয়। কালি অধিৱেশনৰ অন্তিম দিনা পুৱা অসমৰ জনগোষ্ঠীয় ছাত্ৰ যুৱ সন্মিলনেৰে অনুষ্ঠানৰ কাৰ্যসূচী আৰম্ভ হয়। অসম জাতীয়তাবাদী যুৱ-ছাত্ৰ পৰিষদৰ সভাপতি পলাশ চাংমায়ে উদ্বোধন কৰা এই সন্মিলনত কেইবাটাও ছাত্ৰ সংগঠনৰ বিষয়ববীয়াই অংশগ্ৰহণ কৰে। ইয়াৰ পাছতে সাংবাদিক সন্মিলন আৰু সম্বর্ধনা অনুষ্ঠানৰ আয়োজন কৰা হয়। কালিৰ অনুষ্ঠানত ৬৪ গৰাকী সাংবাদিকক নিষ্ঠাৱান সাংবাদিকতাৰ বঁটা আগবঢ়োৱা হয়। দিনৰ ভাগত অনুষ্ঠিত আকাশ শীর্ষক মহিলাসকলৰ প্ৰতিভা বিকাশৰ অনুষ্ঠানটিৰ আয়োজন কৰা হয়। বিয়লি সভাৰ মূল মঞ্চত নাট্য সন্মিলন আৰু গ্ৰন্থমেলাৰ বাকৰিত আজীৱন সভ্য সন্মিলন অনুষ্ঠিত হয়। কালিৰ অনুষ্ঠানতে অসম সাহিত্য সভাৰ প্ৰাক্তন উপ-সভাপতি মৃণালিনী দেৱীক অসম সাহিত্য সভাই জীৱনজোৰা সাহিত্যপ্ৰাণ সন্মান আৰু নৃপেন্দ্ৰ নাথ ভাগৱতীক সেৱাপ্ৰাণ সন্মান প্ৰদান কৰে। নিশাৰ ভাগত অসমীয়া চিৰ সেউজীয়া শীৰ্ষক অনুষ্ঠানৰ পাছত কেইবাগৰাকীও খ্যাতনামা শিল্পীৰ সাংস্কৃতিক অনুষ্ঠানেৰে অধিৱেশনৰ সামৰণি পৰে।