পহিলা অক্টোবৰৰ পৰা ৰাজ্যৰ ৰেচন কাৰ্ডৰ গৰাকীসকলে ৰাজ সাহায্যযুক্ত নিমখ, মচুৰ দাইল আৰু চেনি লাভ কৰিব বুলি মন্ত্ৰী কৌশিক ৰায়ে ঘোষণা কৰিছে। কোকৰাঝাৰ চহৰৰ সমীপৰ বডোফা সাংস্কৃতিক প্ৰকল্পৰ প্ৰেক্ষাগৃহত খাদ্য, ৰাজহুৱা বিতৰণ আৰু গ্ৰাহক পৰিক্ৰমা বিভাগৰ অন্তৰ্গত সকলো সুলভ মূল্যৰ দোকানী আৰু গাঁও পঞ্চায়ত সমবায় সমিতিৰ সৈতে অনুষ্ঠিত বিভাগীয় সজাগতামূলক সন্মিলনত মন্ত্ৰীগৰাকীয়ে এই কথা প্ৰকাশ কৰিছে। বিভাগীয় মন্ত্ৰী কৌশিক ৰায়ে সজাগতা সন্মিলনত কয়, যে ৰেচন কাৰ্ডৰ গৰাকীয়ে ৰাজ সাহায্যযুক্ত প্ৰতিকিলোগ্ৰাম মচুৰ দাইল ৬৯ টকাত, চেনি ৩৮ টকাত আৰু নিমখ ১০ টকাত লাভ কৰিব । এই ১ অক্টোবৰৰ পৰা ১০ খন জিলাত আৰু ১ নৱেম্বৰৰ পৰা ২৫ খন জিলাত এই আঁচনি কাৰ্যকৰী হ’ব। ইয়াৰ ফলত ৰাজ্যৰ ২ কোটি ৪৫ লাখ হিতাধিকাৰী উপকৃত হ’ব বুলি মন্ত্ৰীগৰাকীয়ে সদৰি কৰিছে।