গণিত বিষয়ৰ স্নাতক শিক্ষক পদৰ বাবে পদাৰ্থ বিজ্ঞান, ৰসায়ন বিজ্ঞান অথবা জীৱ বিজ্ঞানৰ ভিতৰত যিকোনো এটা বিষয়ৰ সাধাৰণ স্নাতক হ’লেই হ’ব বুলি বিদ্যালয় শিক্ষা বিভাগে স্পষ্ট কৰি দিছে। শিক্ষামন্ত্রী ডাঃ ৰণোজ পেগুৱে সমগ্ৰ বিষয়টোক লৈ বিদ্যালয় শিক্ষা বিভাগৰ আয়ুক্ত সচিবলৈ পত্ৰ প্ৰেৰণৰ পাছতে বিভাগে পাছকোৰ্চৰ বিভ্ৰান্তি আঁতৰাই এই নিৰ্দেশনা জাৰি কৰে। ৰাজ্যৰ ছটাকৈ মণ্ডলত চলি থকা বিভিন্ন বিষয়ৰ স্নাতক শিক্ষক পদৰ নথি পৰীক্ষণ প্ৰক্ৰিয়াত গণিত বিষয়ৰ স্নাতক শিক্ষক পদৰ প্ৰাৰ্থীসকলৰ অৰ্হতাক লৈ বিভ্ৰান্তিৰ সৃষ্টি হৈছিল। এই ক্ষেত্ৰত মাধ্যমিক শিক্ষাৰ সেৱা বিধিত উল্লেখ থকা মতে গণিতৰ স্নাতক শিক্ষক পদৰ বাবে সংশ্লিষ্ট প্ৰাৰ্থীগৰাকী গণিত বিষয়ত মেজৰ থকাৰ লগতে পাছকোর্চ হিচাপে পদার্থ বিজ্ঞান, ৰসায়ন বিজ্ঞান বা জীৱ বিজ্ঞান বিষয় থাকিব লাগিব। এনেধৰণৰ অৰ্হতাৰ চৰ্তৰ বাবে গণিত বিষয়ত মেজৰ থকাৰ পাছতো একেলগে পদার্থ বিজ্ঞান, ৰসায়ন বিজ্ঞান বা জীৱ বিজ্ঞান পাছকোর্চ হিচাপে নথকা প্ৰাৰ্থীসকলৰ নথি পৰীক্ষণ স্থগিত ৰখা হৈছিল। বঞ্চিত প্ৰাৰ্থীসকলৰ ওজৰ-আপত্তিৰ পাছত আজি বিদ্যালয় শিক্ষা বিভাগৰ স্পষ্টিকৰণে প্ৰাৰ্থীসকলক সকাহ প্ৰদান কৰিছে। বিদ্যালয় শিক্ষা বিভাগৰ এই নিৰ্দেশনাৰ ফলত এহেজাৰ ৭৩৭ টা গণিতৰ স্নাতক শিক্ষক পদ বাবে বাদ পৰি ৰোৱা বহু সংখ্যক প্ৰাৰ্থীৰ নথি পৰীক্ষণৰ বাট মুকলি হ’ব।