প্রধানমন্ত্ৰী নৰেন্দ্ৰ মোদীয়ে আজি ভার্চুৱেল ব্যৱস্থাৰে দেশৰ ৫১ হাজাৰৰো অধিক যুৱক-যুৱতীক নিযুক্তিপত্ৰ বিতৰণ কৰে। এই উপলক্ষে দিয়া ভাষণত শ্ৰীমোদীয়ে নিযুক্তি মেলাই যুৱ প্ৰজন্মৰ সৱলীকৰণ আৰু তেওঁলোকক বিকশিত ভাৰত গঢ়াৰ প্ৰক্ৰিয়াৰ অনুঘটক কৰি তোলাৰ প্ৰতি চৰকাৰৰ প্ৰতিশ্ৰুতিবদ্ধতাক সূচাইছে বুলি মন্তব্য কৰে। তেওঁ কয়, যে ৰাজহুৱা আৰু ব্যক্তিগত খণ্ডত কর্মসংস্থাপন সৃষ্টিৰ ওপৰত চৰকাৰে গুৰুত্ব আৰোপ কৰাৰ বাবে বিগত এঘাৰ বছৰত দেশখনে প্ৰতিটো ক্ষেত্ৰতে অগ্রগতি লাভ কৰিছে। দৰিদ্ৰ লোকৰ বাবে ৪ কোটিৰো অধিক আৱাস গৃহ নিৰ্মাণ, ১০ কোটিৰো অধিক ৰন্ধন গেছৰ নতুন সংযোগ আৰু ছাদৰ ওপৰত সৌৰ প্ৰকল্পকে ধৰি বিভিন্ন কাৰ্যসূচীৰে লাখ লাখ কর্মসংস্থাপনৰ সুযোগ সৃষ্টি হৈছে বুলি শ্রীমোদীয়ে প্ৰকাশ কৰে। এই কাৰ্যসূচীৰ অধীনত এতিয়ালৈ ১০ লাখৰো অধিক নিযুক্তিপত্ৰ বিতৰণ কৰা হৈছে বুলি প্রধানমন্ত্রীয়ে জানিবলৈ দিয়ে।
নতুনকৈ নিযুক্তি লাভ কৰা প্ৰাৰ্থীসকলক অভিনন্দন জনাই শ্ৰীমোদীয়ে কয়, যে চৰকাৰৰ নিযুক্তি মেলা উদ্যমৰ জৰিয়তে লাখ লাখ যুৱক-যুৱতীয়ে ইতিমধ্যে কেন্দ্ৰীয় চৰকাৰৰ অধীনত স্থায়ী নিযুক্তি লাভ কৰিবলৈসমৰ্থ হৈছে। তেওঁ কয় যে এই যুৱক-যুৱতীসকলে সম্প্ৰতি ৰাষ্ট্ৰ গঠন প্ৰক্ৰিয়াত গুৰুত্বপূৰ্ণ ভূমিকা পালন কৰিবলৈ লৈছে।
নিযুক্তি পত্ৰ বিতৰণ অনুষ্ঠানৰ অংশ হিচাপে আজি অসমসহ দেশৰ ৪৭টা স্থানত আজি নিযুক্তি মেলাৰ আয়োজন কৰা হয়। গুৱাহাটী মহানগৰীৰ মালিগাওঁৰ ৰং ভৱনত কেন্দ্ৰীয় মন্ত্ৰী সৰ্বানন্দ সোণোৱালে ২৩৩ গৰাকী নৱ নিযুক্তক নিযুক্তি পত্ৰ বিতৰণ অনুষ্ঠানত উপস্থিত থাকে। এই উপলক্ষে দিয়া ভাষণত শ্ৰীসোণোৱালে কয় যে দেশৰ নেতা সৎ, ককঠোৰ আৰু পৰিশ্ৰমী হোৱাৰ লগতে জনগণৰ কল্যানৰ বাবে নিষ্ঠাৰে কাম কৰিলে সফলতা সম্ভৱ হৈ উঠে। বিগত এঘাৰ বছৰত প্ৰধানমন্ত্ৰী নৰেন্দ্ৰ মোদীৰ নেতৃত্বত ভাৰত বিশ্বৰ ভিতৰত অন্যতম শক্তিশালী ৰাষ্ট্ৰ হিচাপে পৰিগণিত হৈছে বুলি তেওঁ উল্লেখ কৰে। নিযুক্তি লাভ কৰা প্ৰাৰ্থীসকলে ৰে‘ল মন্ত্ৰ্যালয়, গৃহ পৰিক্ৰমা, কৰ্মচাৰী আৰু ওজৰ-আপত্তি নিষ্পত্তি আৰু পেঞ্চন, শ্ৰম আৰু নিয়োগ মন্ত্ৰালয়, ৰাজহ বিভাগ, ডাক বিভাগ আৰু উচ্চ শিক্ষা বিভাগকে ধৰি বিভিন্ন মন্ত্ৰালয়ে এই বিভাগত যোগদান কৰিব।
