প্রধানমন্ত্ৰী নৰেন্দ্ৰ মোদীয়ে নেপালত সংঘটিত বাছ দুৰ্ঘটনাত নিহত ভাৰতীয় লোকসকলৰ মৃত্যুত গভীৰ শোক প্ৰকাশ কৰি ক্ষতিপূৰণ দিয়াৰ কথা ঘোষণা কৰিছে। প্ৰধানমন্ত্ৰী মোদীয়ে শোক সন্তপ্ত পৰিয়াললৈ সমবেদনা জ্ঞাপন কৰাৰ লগতে আহতসকলৰ আশু আৰোগ্য কামনা কৰে। নেপালত থকা ভাৰতীয় দূতাৱাসে দুৰ্ঘটনাত আক্রান্ত লোকসকলক সকলো ধৰণৰ সহায় আগবঢ়াইছে। প্রধানমন্ত্ৰীৰ কাৰ্যালয়ে প্ৰকাশ কৰা অনুসৰি দুৰ্ঘটনাত নিহত প্ৰতিজন লোকৰ পৰিয়াললৈ প্ৰধানমন্ত্ৰীৰ ৰাষ্ট্ৰীয় সাহায্য পুঁজিৰ পৰা ২ লাখ আৰু আহতসকলক ৫০ হাজাৰ টকাকৈ এককালীন সাহায্য প্ৰদান কৰা হ’ব। উল্লেখযোগ্য যে নেপালৰ পুখাৰাৰ পৰা কাঠমাণ্ডুলৈ পৰ্যটক কঢ়িয়াই নিয়া এখন বাছ মাৰ্ছিয়াংদি নদীত পৰি যোৱাৰ ফলত ২৭ জন লোকৰ প্ৰাণহানি হোৱাটো নিশ্চিত হৈছে।