পাকিস্তানৰ খাইবাৰ পাখটুনখৱা প্ৰদেশৰ কুৰ্ৰম জিলাত কালি যাত্রীবাহী বাহনক লক্ষ্য কৰি বন্দুকধাৰীয়ে চলোৱা নিৰ্বিচাৰ গুলীচালনাৰ ঘটনাত মৃত্যু হোৱা লোকৰ সংখ্যা ৪৫ লৈ বৃদ্ধি পাইছে। এই ঘটনাত অন্য ২০জন লোক আহত হৈছে। পাকিস্তানৰ অভ্যন্তৰীণ মন্ত্ৰী মোহছিন নাকভিয়ে আফগানিস্তান সীমান্তৱৰ্তী জিলাখনত সংঘটিত আক্ৰমণত হতাহতৰ সংখ্যাৰ বিষয়ে নিশ্চিত কৰিছে। জিলা আৰক্ষী আৰু হাস্পতালৰ সূত্ৰৰ পৰা জানিব পৰা মতে হতাহতসকলৰ ভিতৰত সুৰক্ষা কৰ্মী, মহিলা আৰু শিশুও আছে। এই ঘটনাত নিহত লোকৰ সংখ্যা বৃদ্ধি পাব পাৰে বুলি আশংকা কৰা হৈছে। আৰক্ষীয়ে এই ঘটনাৰ সৈতে জড়িত আক্ৰমণকাৰীসকলক কৰায়ত্ত কৰাৰ বাবে অভিযান আৰম্ভ কৰিছে। অৱশ্যে এতিয়ালৈকে কোনো সন্ত্রাসবাদী গোটে এই আক্ৰমণৰ দায়িত্ব স্বীকাৰ কৰা নাই ।