এন আই টি শিলচৰৰ ইলেকট্রিকেল ইঞ্জিয়াৰিং বিভাগৰ প্ৰথম বৰ্ষৰ এগৰাকী ছাত্ৰীৰ শ্লীলতাহানিৰ অভিযোগত বিভাগটোৰ এগৰাকী অধ্যাপকক নিলম্বন কৰা হৈছে। অভিযোগ অনুসৰি অধ্যাপকগৰাকীয়ে ছাত্ৰীগৰাকীক অনুচিতভাৱে স্পৰ্শ কৰাৰ চেষ্টা চলায় । পাছত ছাত্ৰীগৰাকীয়ে এই কাণ্ডৰ বিষয়ে অন্যান্য ছাত্ৰ-ছাত্ৰীসকলক অৱগত কৰোৱাৰ পাছত তেওঁলোকে ইয়াৰ ব্যৱস্থা গ্ৰহণ কৰিবলৈ এন আই টি শিলচৰৰ সঞ্চালক আৰু পঞ্জীয়কক দাবী জনায়। অভিযোগক কেন্দ্ৰ কৰি প্ৰতিষ্ঠানটোৰ কেইবাশ ছাত্র-ছাত্রীয়ে কালি অধ্যাপকগৰাকীক শাস্তিৰ দাবী জনাই প্ৰতিবাদ সাব্যস্ত কৰে। ছাত্ৰীগৰাকীয়ে এই নিৰ্যাতনৰ অভিযোগ উত্থাপন কৰাত আভ্যন্তৰীণ অভিযোগ সমিতিয়ে অধ্যাপকগৰাকীৰ বিৰুদ্ধে তদন্ত কৰি তেওঁক নিলম্বন কৰে ।