ৰাষ্ট্ৰীয় মানৱাধিকাৰ আয়োগে দিল্লী চৰকাৰৰ দ্বাৰা পৰিচালিত আশা কিৰণ নামৰ আশ্ৰয় গৃহত এটা মাহৰ ভিতৰত ১২ জনকৈ লোকে প্ৰাণ হেৰুওৱা বুলি ওলোৱা বাতৰি সন্দৰ্ভত দিল্লীৰ মুখ্য সচিব আৰু আৰক্ষী আয়ুক্তলৈ জাননী জাৰি কৰিছে। সংবাদ মাধ্যমত প্রকাশিত বাতৰি সন্দৰ্ভত নিজাববীয়াকৈ ব্যৱস্থা গ্ৰহণ কৰি আয়োগে চাৰি সপ্তাহৰ ভিতৰত বিস্তৃত প্রতিবেদন বিচাৰিছে। একাংশ সংবাদ মাধ্যমত মাত্ৰাধিক লোকে আশ্ৰয় লৈ থকা আশ্রয় গৃহসমূহত মানৱ অধিকাৰৰ উলংঘন হোৱাৰ গুৰুতৰ বাতৰি প্ৰকাশ পোৱা আয়োগৰ দৃষ্টিগোচৰ হৈছে। আয়োগে কৈছে যে, কম দিনৰ ভিতৰতে ভালেসংখ্যক লোকৰ মৃত্যুৰ পৰা কৰ্তৃপক্ষসমূহৰ অৱহেলাৰ কথা স্পষ্ট হৈ পৰিছে। ৰাষ্ট্ৰীয় মানৱাধিকাৰ আয়োগে কৈছে যে, সংবাদ মাধ্যমৰ বাতৰি অনুসৰি আশা কিৰণত সৰ্বাধিক ৫০০ জন লোক থকাৰ সুবিধা আছে যদিও সম্প্রতি আশ্রয় গৃহটোত এহেজাৰৰো অধিক লোক বাস কৰি আছে।