নৱবৰ্ষ উপলক্ষে প্রধানমন্ত্ৰী নৰেন্দ্ৰ মোদী, ৰাজ্যপাল লক্ষ্মণ প্ৰসাদ আচাৰ্য আৰু মুখ্যমন্ত্ৰী ড° হিমন্ত বিশ্ব শৰ্মাই ৰাজ্যখনৰ জনসাধাৰণক শুভেচ্ছা জনাইছে। প্রধানমন্ত্রী মোদীয়ে নৱবৰ্ষ উপলক্ষে দিয়া এটা বাৰ্তাত ২০২৬ বৰ্ষই সকলোৰে বাবে সু-স্বাস্থ্য, সমৃদ্ধি আৰু সফলতা কঢ়িয়াই অনাৰ লগতে সমাজত সুখ-শান্তি অক্ষুণ্ণ থাকিব বুলি আশা প্রকাশ কৰে। ৰাজ্যপাল শ্ৰী আচাৰ্যই নৱবৰ্ষ উপলক্ষে দিয়া এটা শুভেচ্ছাবাণীত সকলোৰে জীৱনলৈ নতুন বছৰে প্ৰগতি তথা সমৃদ্ধিৰ সুযোগ কঢ়িয়াই আনিব বুলি আশা প্রকাশ কৰে। তেওঁ লগতে অসমৰ প্ৰাকৃতিক সম্পদ, বনাঞ্চল আৰু জৈৱ বৈচিত্ৰ্য সংৰক্ষণৰ বাবে নতুন বছৰত সকলোকে যত্নপৰ হ’বলৈ আহ্বান জনায়। এটা বিবৃতিত মুখ্যমন্ত্ৰী ড° শৰ্মাই ইংৰাজী নৱবৰ্ষই অসমবাসীলৈ নতুন আশা আৰু নৱচেতনা কঢ়িয়াই আনিব বুলি আশা প্রকাশ কৰে। নতুন বছৰটোৱে স্বকীয় পৰম্পৰা তথা গৰিমামণ্ডিত ঐহিত্যৰে সমৃদ্ধ ৰাজ্যৰ জনসাধাৰণৰ মাজৰ সম্প্ৰীতিৰ এনাজৰী অধিক সুদৃঢ় কৰি তুলিব বুলি ড° শৰ্মাই আশা প্ৰকাশ কৰে।