শিক্ষা মন্ত্ৰালয়ৰ বিদ্যালয় শিক্ষাৰ সাক্ষৰতা বিভাগে প্ৰতি বছৰে ৫ ছেপ্তেম্বৰত শিক্ষক দিৱস উপলক্ষে প্ৰদান কৰা ৰাষ্ট্ৰীয় শিক্ষক বঁটাৰ বাবে এই বছৰো যোগ্য শিক্ষকৰ পৰা অনলাইন যোগে স্ব-মনোনয়ন বিচৰা হৈছে। অহা ২৭ জুনৰ পৰা শিক্ষা মন্ত্ৰ্যালয়ৰ পোৰ্টেলৰ জৰিয়তে যোগ্য শিক্ষকসকলে স্ব-মনোনয়ন দাখিল কৰিব পাৰিব। মনোনয়ন দাখিলৰ অন্তিম তাৰিখ হৈছে ১৫ জুলাই। শিক্ষা মন্ত্র্যালয়ে এটা বিবৃতি যোগে সদৰী কৰা তথ্য অনুসৰি এইবাৰ জিলা, ৰাজ্য আৰু ৰাষ্ট্ৰীয় মুঠ তিনিটা পৰ্যায়ত বাছনি প্ৰক্ৰিয়াৰ জৰিয়তে ৫০ গৰাকী শিক্ষকক বাছি উলিওৱা হ’ব। অহা ৫ ছেপ্তেম্বৰত নতুন দিল্লীৰ বিজ্ঞান ভৱনত হ’বলগীয়া এটা অনুষ্ঠানত ৰাষ্ট্ৰপতিয়ে এই বঁটা প্ৰদান কৰিব। উল্লেখযোগ্য যে, কঠোৰ, স্বচ্ছ আৰু অনলাইন নিৰ্বাচনৰ জৰিয়তে দেশৰ শ্রেষ্ঠ শিক্ষকসকলক বাছনি কৰা এই বঁটাৰ উদ্দেশ্য হৈছে শিক্ষকসকলৰ অনন্য অৱদানক উদযাপন কৰা।