ৰাষ্ট্ৰীয় তদন্তকাৰী সংস্থাই (এন আই এ) নিষিদ্ধ ঘোষিত উগ্ৰপন্থী সংগঠনৰ দুজন লোকক গ্ৰেপ্তাৰ কৰিছে। বিগত বৰ্ষৰ নৱেম্বৰত মণিপুৰৰ জিৰিবাম জিলাত এগৰাকী মহিলাক নৃশংসভাৱে হত্যা কৰা আৰু বহুকেইটা ঘৰ লুটপাত কৰি জ্বলাই দিয়া কাৰ্যৰ সৈতে জড়িত থকাৰ অভিযোগত লোক দুজনক গ্ৰেপ্তাৰ কৰা হয়। এন আই এই এটা বিবৃতিত প্ৰকাশ কৰা অনুযায়ী বিষ্ণুপুৰ জিলাৰ আবাসী, অভিযুক্ত নংথোমবাম মেইৰাবা হৈছে উগ্ৰপন্থী সংগঠন-ইউনাইটেড নেচনেল লিবাৰেচন ফ্ৰণ্টৰ সদস্য আৰু তেওঁ মূলতঃ মহিলাগৰাকীক হত্যা কৰাৰ সৈতে জড়িত আছিল। আন এজন অভিযুক্ত থৌগল জিলাৰ ছাগলছেম ছানাতোম্বা হৈছে মণিপুৰৰ আন এটা উগ্ৰপন্থী সংগঠন- কে ৱাই কে এলৰ সদস্য। দুয়োজন উগ্ৰপন্থী গোটৰ সদস্যক ১৭ মে’লৈ এন আই এৰ জিম্মাত ৰখা হ’ব।