অসম-নাগালেণ্ডৰ মেৰাপানী সীমাত নাগালেণ্ড প্রশাসনে অসমীয়া লোকৰ প্ৰৱেশক লৈ জাৰি কৰা জাননী সন্দৰ্ভত শেহতীয়ালৈ নগা ভিলেজ কাউন্সিল আৰু অসমৰ গাঁওপ্ৰধানৰ মাজত এখন গুৰুত্বপূৰ্ণ বৈঠক অনুষ্ঠিত হয়। এই বৈঠকত অসমৰ সীমাৱৰ্তী অঞ্চলৰ ১৭খন গাঁৱৰ গাঁওপ্রধান, দৈয়াং গাঁওবুঢ়া সন্থাৰ সভাপতি সম্পাদক আৰু নাগালেণ্ডৰ ভাণ্ডাৰী মহকুমাৰ ১১ গৰাকী ভিলেজ কাউন্সিলে অংশগ্ৰহণ কৰে। মেৰাপানীৰ বালিগুৰিত অনুষ্ঠিত এই সভাত নগা ভিলেজ কাউন্সিলে অসমীয়া লোকৰ প্ৰৱেশৰ ক্ষেত্ৰত বিহা জৰিমনা প্ৰত্যাহাৰৰ সিদ্ধান্ত গ্ৰহণ কৰে। তদুপৰি অসমীয়া লোকে নাগালেণ্ডত প্ৰৱেশ কৰাৰ ক্ষেত্ৰত আন্তঃৰাজিক পাৰপত্ৰ বা নগা ভিলেজ কাউন্সিলৰ অনুমতি লোৱাৰ বিষয়তে নগাই হস্তক্ষেপ নকৰে বুলি বৈঠকত প্ৰকাশ কৰে। দুয়োখন ৰাজ্যৰ মাজত শান্তি-সম্প্ৰীতি বজাই ৰখাৰ বাবে সকলোৱে সহযোগিতা আগবঢ়োৱাৰ বাবেও সভাত সিদ্ধান্ত লোৱা হয়।