অসম গণ পৰিষদে শিল্পীগৰাকীৰ জন্মদিনটো সমগ্র ৰাজ্যতে জাতীয় স্বাভিমান দিৱস হিচাপে পালন কৰিছে। এই উপলক্ষে আজি গুৱাহাটীৰ আমবাৰীত থকা দলৰ মুখ্য কাৰ্যালয়ত ৰক্তদান শিবিৰ অনুষ্ঠিত হয়। অগপৰ সভাপতি তথা মন্ত্রী অতুল বৰাই এই শিবিৰ মুকলি কৰে। অসম গণ পৰিষদৰ বৰপেটা জিলা সমিতিয়ে আজি শিল্পীগৰাকীৰ ওপজা দিনটো স্বাভিমান দিৱস ৰূপে পালন কৰে। এই উপলক্ষে শিল্পীগৰাকীলৈ শ্ৰদ্ধাঞ্জলি জনাই নাহৰকে ধৰি বিবিধ মূল্যবান গছপুলি ৰোপণ কৰা হয়।
শিল্পীগৰাকীৰ ওপজা দিন উপলক্ষে আজি শিলচৰত ব্যতিক্রমী কাৰ্যসূচী ৰূপায়ণ কৰা হয়। জিলা ক্রীড়া সন্থা খেলপথাৰত আয়োজিত কাৰ্যসূচীত শিল্পীগৰাকীৰ কালজয়ী মায়াবিনী ৰাতিৰ বুকুত গীতটো অসমীয়া আৰু বাংলা ভাষাত সহস্রাধিক লোকে পৰিবেশন কৰি শিল্পীগৰাকীৰ প্ৰতি বৰাকবাসীৰ অকৃত্রিম ভালপোৱা প্রকাশ কৰে।
যোৰহাট জিলাত আয়োজিত ৰক্তদান শিবিৰত মৰিয়নী বিধায়ক ৰূপজ্যোতি কর্মী উপস্থিত থাকে। সদৰ থানাত আয়োজিত কাৰ্যসূচীত আৰক্ষী অধীক্ষক শুভ্রজ্যোতি বৰা উপস্থিত থাকি শিল্পীগৰাকীৰ প্রতি শ্রদ্ধা জ্ঞাপন কৰে।
