কেন্দ্ৰীয় চৰকাৰৰ জনজাতি পৰিক্ৰমা মন্ত্ৰালয়ে ৰূপায়ণ কৰা আদি কৰ্মযোগী অভিযান ৰাজ্যৰ বিভিন্ন জিলাত ৰূপায়ণ কৰা হৈছে। সেৱা, নিষ্ঠা আৰু সংকল্প নীতিৰ দ্বাৰা পৰিচালিত এই অভিযানৰ জৰিয়তে সমগ্র দেশৰ ৩০খন ৰাজ্য আৰু কেন্দ্ৰীয় শাসিত অঞ্চলৰ ১ লাখ জনজাতীয় গাঁও, ৩ হাজাৰ উন্নয়ন খণ্ড আৰু ৫৫০খন জিলাক সামৰি লোৱা হৈছে। ইয়াৰ দ্বাৰা জনজাতীয় অঞ্চলত ৰূপান্তৰ সাধনৰ বাবে ২০ লাখ জনজাতীয় কেডাৰ সৃষ্টি কৰাৰ লক্ষ্য লোৱা হৈছে। যোৰহাট জিলাতো এই অভিযান ৰূপায়ণ কৰা হৈছিল। জিলাখনৰ ৩০খন জনজাতীয় গাঁও চিনাক্ত কৰি এই কাৰ্যসূচী লোৱা হৈছে। ইয়াৰ অংশ হিচাপে যোৰহাট চৰকাৰী উচ্চতৰ মাধ্যমিক বহুমুখী বালক বিদ্যালয়ত তিনিদিনীয়াকৈ প্রশিক্ষণ কার্যসূচী অনুষ্ঠিত হয়। জিলাখনৰ পাঁচগৰাকী বিষয়াই এই প্রশিক্ষণত অংশ লৈ কৰ্মচাৰীসকলক প্ৰশিক্ষণ দিয়ে। তদুপৰি যোৰহাট জিলাৰ বিভিন্ন জনজাতীয় গাঁও এই অভিযানৰ অধীনত কর্মশালা অনুষ্ঠিত হৈছে। জিলাখনৰ উত্তৰ-পশ্চিম উন্নয়ন খণ্ডৰ ১৬খন, পূব টীয়কৰ তিনিখনকে ধৰি ৩০খন গাঁওসভা অনুষ্ঠিত হৈছে বুলি আমাৰ সংবাদদাতাই জনাইছে।