ধেমাজি জিলাৰ জোনাইত যোৱা নিশা জোনাই মহকুমা আৰক্ষী বিষয়া সূর্যকান্ত মৰাঙে সদৌ অসম ছাত্ৰ সন্থাৰ এগৰাকী স্থানীয় নেতাক প্ৰহাৰ কৰাৰ ঘটনাক কেন্দ্ৰ কৰি আজি জোনাইত উত্তপ্ত পৰিস্থিতিয়ে বিৰাজ কৰে। ঘটনা পোহৰলৈ অহাৰ পাছতে পুৱতি নিশাই ছাত্ৰ সন্থাৰ বহু সদস্যই জোনাই আৰক্ষী থানাত উপস্থিত হৈ আৰক্ষীৰ বিষয়াজনৰ বিৰুদ্ধে প্ৰতিবাদ সাব্যস্ত কৰে। ঘটনাটোক গৰিহণা দি ধেমাজি জিলাৰ ছাত্ৰ সন্থাৰ সভাপতি সঞ্জীৱ দাসে ঘটনাৰে জড়িত আৰক্ষী বিষয়াগৰাকীক উচিত শাস্তি প্ৰদানৰ দাবী জনায়। ধেমাজি ছাত্ৰ সন্থাই জোনাই থানাৰ সন্মুখত প্ৰতিবাদী কাৰ্যসূচী গ্ৰহণ কৰাৰ লগতে ৰাজপথত প্ৰতিবাদী সমদল উলিয়ায়। ইপিনে গুৰুতৰভাৱে আঘাতপ্ৰাপ্ত ছাত্ৰ সন্থাৰ নেতাগৰাকীক উন্নত চিকিৎ‍সাৰ বাবে পুৱাই অসম চিকিৎসা মহাবিদ্যালয়লৈ প্ৰেৰণ কৰা হয়৷