২০২৫-২৬ বিত্তীয় বৰ্ষৰ প্ৰথম তিনি মাহৰ দেশৰ বৈদ্যুতিন সামগ্ৰীৰ ৰপ্তানি ২০২৪-২৫ বৰ্ষৰ একেই সময়ছোৱাৰ তুলনাত ৪৭ শতাংশৰো অধিক বৃদ্ধি পাইছে বুলি বাণিজ্য আৰু উদ্যোগ মন্ত্রী পীয়ুষ গোৱেলে প্রকাশ কৰিছে। শ্রী গোৱেলে কালি সামাজিক মাধ্যমযোগে কয়, যে মেক ইন ইণ্ডিয়া অভিযানৰ সাফল্যৰ বাবে যোৱা দশকত বৈদ্যুতিন সামগ্রী উৎপাদন তিনি হাজাৰ ১০০ কোটি ডলাৰৰ পৰা ১৩ হাজাৰ ৩০০ কোটি ডলাৰলৈ বৃদ্ধি পাইছে। শ্ৰী গোৱেলে কয়, যে চৰকাৰে নিৰ্মাণ খণ্ডত দেশক আত্মনিৰ্ভৰ কৰি তোলাৰ বাবে প্ৰয়াস চলাই আছে। তেওঁ কয়, যে এনে প্ৰয়াসৰ ফলস্বৰূপে দেশত মোবাইল ফোন নির্মাণ গোটৰ সংখ্যা সম্প্ৰতি তিনিশৰো অধিক হৈছে। ২০১৪ চনত দেশত মাত্র দুটা মোবাইল ফোন নির্মাণ গোট আছিল বুলি মন্ত্ৰীগৰাকীয়ে উল্লেখ কৰে। মন্ত্ৰীগৰাকীয়ে কয়, যে ভাৰত সম্প্ৰতি মোবাইল ফোন আমদানিকাৰী নহয় বৰং বিশ্বৰ দ্বিতীয় সর্ববৃহৎ মোবাইল ফোন নিৰ্মাণকাৰী ৰাষ্ট্ৰ। বৈদ্যুতিন খণ্ডত কৰ্ম সংস্থাপনৰ ন ন সুযোগ সৃষ্টি হৈছে বুলি মন্ত্ৰীগৰাকীয়ে উল্লেখ কৰে।