ভাৰতীয় ৰে’লৱেই মহাকুম্ভ মেলাৰ অন্তিম সপ্তাহত যাত্ৰীৰ সমাগম নিয়ন্ত্ৰণৰ বাবে বিশেষ তৎপৰতা গ্ৰহণ কৰিছে। ইয়াৰ বাবে বিভিন্ন ষ্টেচনত প্লেটফৰ্মৰ বাহিৰত আছুতীয়া অঞ্চলৰ ব্যৱস্থা কৰা হৈছে। যাৰ দ্বাৰা যাত্ৰীৰ অহা-যোৱা আৰু ভিৰ নিয়ন্ত্ৰণ কৰিব পৰা যাব। ৰে’লৰ নিৰ্ধাৰিত সময় অনুসৰিহে যাত্ৰীসকলক প্লেটফৰ্মত প্ৰৱেশৰ অনুমতি দিয়া হ’ব বুলিও স্পষ্ট কৰি দিয়া হৈছে। যোৱা শনিবাৰে নতুন দিল্লী ৰে’লৱে ষ্টেচনত হোৱা হেঁচা-ঠেলাৰ ঘটনাৰ পৰিপ্ৰেক্ষিতত অযোধ্যা, বাৰানসী, গাজিয়াবাদ, নতুন দিল্লী আৰু আনন্দ বিহাৰকে ধৰি প্ৰধান ষ্টেচনসমূহত এনে আছুতীয়া অঞ্চলৰ ব্যৱস্থা কৰাৰ লগতে ৰে’লৱে সুৰক্ষা বাহিনীৰ জোৱান মোতায়েন কৰা হৈছে।