ভাৰতৰ ২৩ বছৰ অনূৰ্ধ্ব পুৰুষৰ ফুটবল দলৰ মুখ্য প্রশিক্ষক নৌছাদ মুছাই টাজিকিস্তান আৰু কিৰ্গিস্তানৰ বিৰুদ্ধে প্ৰীতি খেলত ভাগ ল’বলগীয়া ২৩জনীয়া দলটোৰ সদস্যসকলৰ নাম ঘোষণা কৰিছে। ভাৰত কাইলৈ ভাৰতীয় সময় অনুসৰি নিশা চাৰে ৮ বজাত টাজিকিস্তানৰ ৰাজধানী ডুছানবেৰ সমীপৱৰ্তী হিছ’ৰৰ চেণ্ট্ৰেল ষ্টেডিয়ামত দেশখনৰ দলটোৰ মুখামুখি হ’ব। ইয়াৰ পাছত অহা ২১ জুনত একেখন ঠাইতে আৰু একে সময়তে ভাৰত কির্গিস্তানৰ বিৰুদ্ধে অৱতীৰ্ণ হ’ব। এই দুখন খেলৰ বাবে ভাৰতীয় দলটো কালি বিয়লি টাজিকিস্তানলৈ ৰাওনা হয়। এই ভ্ৰমণৰ বাবে দলটোৱে যোৱা পহিলা জুনৰ পৰা কলকাতাৰ এ আই এফ এফ ৰাষ্ট্ৰীয় উৎকর্ষতা কেন্দ্ৰত প্ৰশিক্ষণ গ্রহণ আৰু অনুশীলন কৰি আছিল। ছেপ্তেম্বৰত হ’বলগীয়া ২০২৬ বৰ্ষৰ ২৩ বছৰ অনূৰ্ধ্ব এ এফ চি এছিয়ান কাপ প্রতিযোগিতাৰ যোগ্যতা নির্ণয়কাৰী খেলৰ প্ৰস্তুতিৰ অংশ হিচাপে ভাৰতে এই খেল দুখনত অংশগ্ৰহণ কৰিব।