মহিলাৰ আই চি চি বিশ্বকাপ ক্রিকেট প্রতিযোগিতাত যোৱা নিশা গুৱাহাটীৰ বৰ্ষাপাৰা ক্ৰিকেট ষ্টেডিয়ামত অনুষ্ঠিত এখন খেলত ইংলেণ্ডে বাংলাদেশক ৪ উইকেটত পৰাস্ত কৰে। এয়া হ’ল প্ৰতিযোগিতাত বাংলাদেশৰ প্ৰথম পৰাজয় আৰু ইংলেণ্ডৰ দ্বিতীয় জয়। খেলখনত প্ৰথমে বেট ধৰাৰ আমন্ত্ৰণ লাভ কৰি বাংলাদেশে দুটা বল বাকী থকা অৱস্থাত ১৭৮ ৰানতে আটাইকেইটা উইকেট হেৰুৱায়। দলটোৰ হৈ শোভানা মোস্তাৰীয়ে সৰ্বাধিক ৬০ ৰানৰ বৰঙণি আগবঢ়োৱাৰ বিপৰীতে ৰাবেয়া খানে ৪৩ ৰান কৰি আউট নোহোৱাকৈ থাকে। ইংলেণ্ডৰ ছফী এক্লেষ্টনে তিনিটা উইকেট দখল কৰে। প্ৰত্যুত্তৰত ইংলেণ্ডে হিথাৰ নাইটৰ ৭৯ ৰানৰ সহায়ত বিজয় লক্ষ্য অতিক্ৰম কৰে। অপৰাজিত হৈ থকা নাইটক প্লেয়াৰ অৱ দা মেচ বঁটা প্ৰদান কৰা হয় ।
প্রতিযোগিতাত আজি শ্ৰীলংকাৰ কলম্বোৰ আৰ প্ৰেমদাছা ষ্টেডিয়ামত অষ্ট্ৰেলিয়া পাকিস্তানৰ বিৰুদ্ধে অৱতীৰ্ণ হ’ব। খেলখন ভাৰতীয় সময় অনুসৰি বিয়লি ৩ বজাত আৰম্ভ হ’ব।