ডিব্ৰুগড় জিলাৰ টিপাম পাহাৰত কয়লাৰ অবৈধ খনন ৰোধ কৰাৰ লগতে এই ব্যৱস্থা নিৰীক্ষণ কৰিবলৈ গুৱাহাটী উচ্চ ন্যায়ালয়ে ৰাজ্য চৰকাৰক নির্দেশ দিছে। ৰাজ্য চৰকাৰৰ বন আৰু খনি তথা খনিজাত সামগ্ৰী বিভাগৰ লগতে আৰক্ষী সঞ্চালকপ্রধান, ক’ল ইণ্ডিয়া লিমিটেড আৰু ভাৰতীয় পুৰাতাত্ত্বিক জৰীপ বিভাগকো অবৈধ খনন ৰোধৰ বাবে চোকা দৃষ্টি ৰাখিবলৈ নিৰ্দেশ দিয়া হৈছে। ঐতিহাসিক দিশৰ পৰা গুৰুত্বপূৰ্ণ টিপাম পাহাৰত কিছু বছৰ পূৰ্বে কয়লাৰ অবৈধ খনন হোৱা বুলি একাংশ সংবাদ মাধ্যমত প্রকাশিত বাতৰিৰ ভিত্তিত গুৱাহাটী উচ্চ ন্যায়ালয়ে নিজাববীয়াকৈ গ্ৰহণ কৰা এখন জনস্বার্থজড়িত আবেদনৰ ভিত্তিত এই ৰায় দিয়ে। মুখ্য ন্যায়াধীশ বিজয় বিষ্ণয় আৰু ন্যায়াধীশ সুমন শ্যামৰ বিচাৰপীঠে কালি এই নির্দেশ দিয়ে। আদালতে ৰাজ্য চৰকাৰক কয়লাৰ অবৈধ খননৰ বিৰুদ্ধে কঠোৰ ব্যৱস্থা অব্যাহত ৰখাৰ লগতে ভৱিষ্যতে এই কাৰ্যৰ পুনৰাবৃত্তি নকৰাটো নিশ্চিতি কৰিবলৈ নির্দেশ দি আবেদনখন নিষ্পত্তি কৰে।