ডিব্ৰুগড়ত মহাবাহু ব্ৰহ্মপুত্ৰৰ খহনীয়াই মহানগৰখনৰ প্ৰতি ভাবুকিৰ সৃষ্টি কৰিছে। ডিব্ৰুগড়ৰ সুৰক্ষা বান্ধত হোৱা খহনীয়াত কালি এটা যোগ প্রশিক্ষণ কেন্দ্ৰ ব্ৰহ্মপুত্ৰৰ বুকুত জাহ যায়। এই খহনীয়াৰ ফলত শতাধিক জিঅ’ বেগো উটি যোৱা বুলি আমাৰ সংবাদদাতাই জানিবলৈ দিছে। এই খহনীয়া মহানগৰখনৰ জগাৰ্ছ পার্ককে ধৰি ভালেমান অনুষ্ঠান-প্ৰতিষ্ঠানলৈ অশনি সংকেট কঢ়িয়াই আনিছে। কালি অসম চৰকাৰৰ কেবিনেট মন্ত্ৰী প্ৰশান্ত ফুকন আৰু জিলা আয়ুক্ত বিক্ৰম কৈৰীৰ লগতে জলসম্পদ বিভাগৰ ভালেকেইগৰাকী উচ্চ পদস্থ বিষয়া খহনীয়াস্থলীত উপস্থিত হয় আৰু খহনীয়া প্ৰতিৰোধৰ বাবে ব্যৱস্থাৰ বাবে যাৱতীয় পদক্ষেপসমূহৰ তদাৰক কৰে। জিলা প্ৰশাসনে খহনীয়া সংঘটিত অঞ্চলৰ আশে-পাশে বাস কৰা লোকসকলক আঁতৰি যাবলৈ মাইক যোগে ঘোষণা কৰে।