ডিব্ৰুগড় জিলাৰ লোহাৰপট্টি অঞ্চলৰ জুবিন গাৰ্গৰ অনুৰাগীসকলে কালি নিশা অসম চিকিৎসা মহাবিদ্যালয়ৰ ৰোগী তথা আত্মীয়সকলক খাদ্য বিতৰণ কৰি শিল্পীগৰাকীৰ আদৰ্শক জীয়াই ৰখাৰ প্ৰচেষ্টা গ্রহণ কৰে। উল্লেখযোগ্য যে শিল্পীগৰাকীৰ আকস্মিক মৃত্যুৰ বাতৰি বিয়পি পৰাৰ লগে লগে ৰাজ্যৰ অন্যান্য ঠাইৰ লগতে ডিব্ৰুগড় জিলাতো বন্ধৰ স্বতঃস্ফূৰ্ত প্ৰভাৱ পৰে ৷ ইপিনে সমগ্ৰ ৰাজ্যতে ড্রাই ডে ঘোষণা কৰাৰ সময়তে ডিব্ৰুগড় জিলা প্রশাসনে কালি নিশা অভিযান চলাই চহৰখনৰ পুৰণি ৰে’লৱে ষ্টেচনৰ সমীপৰ ছুইপাৰপট্টিত অবৈধভাৱে মজুত ৰখা সুৰা জব্দ কৰাৰ লগতে জুৱাৰ আড্ডাও উৎখাত কৰে। ডিব্ৰুগড় ছাত্ৰ সন্থাৰ নিজাববীয়া অনুসন্ধানৰ জৰিয়তে এই অসাধু চক্ৰৰ ব্যৱসায় চলাই থকা কথাতো পোহৰলৈ আহে। পাছত জিলা প্রশাসন, আবকাৰী বিভাগ আৰু ছাত্ৰ সন্থাৰ প্ৰতিনিধি দলৰ উপস্থিতিত অঞ্চলটোত প্রশাসনে অভিযান চলাই বুজন পৰিমাণৰ অবৈধ সুৰা আৰু অন্যান্য নিষিদ্ধ সামগ্রী জব্দ কৰিবলৈ সমৰ্থ হয় ।