ধুবুৰীৰ ভোলানাথ মহাবিদ্যালয়ৰ অসমীয়া বিভাগৰ উদ্যোগত সপ্তাহজোৰা কাৰ্যসূচীৰে অসমীয়া ভাষাই ধ্ৰুপদী ভাষাৰ মৰ্যাদা লাভ কৰাৰ পৰিপ্ৰেক্ষিতত বিভিন্ন কাৰ্যসূচী ৰূপায়ণ কৰা হৈছে। এই উপলক্ষে কালি পুৱা ছাত্র-ছাত্রীসকলে এটি শোভাযাত্রা উলিয়ায়। ছাত্র-ছাত্রীসকলে অসমীয়া ভাষা সাহিত্যৰ সেৱকসকলৰ বচন আৰু ভাষা ৰক্ষাৰ উদ্দেশ্যে আগবঢ়োৱা ভালেমান মন্তব্য লিখিত ৰূপত হাতে হাতে লৈ বিভিন্ন সংগীত পৰিবেশনেৰে ধুবুৰী চহৰ পৰিভ্ৰমণ কৰে। শোভাযাত্ৰাত মহাবিদ্যালয়খনৰ অধ্যাপক-অধ্যাপিকাসকলৰ লগতে শতাধিক ছাত্ৰ- ছাত্ৰীয়ে অংশগ্ৰহণ কৰে। তাৰ পাছতে ভাষাটোৰ সৃষ্টিশীল সাহিত্যক সমৃদ্ধ কৰাৰ ক্ষেত্ৰত উল্লেখযোগ্য অৱদান থকা অসমীয়া ফকৰা যোজনা লিখা এখন প্রতিযোগিতাও অনুষ্ঠিত হয়।