অসম চৰকাৰে সৃষ্টিশীল বিজ্ঞানসন্মত আৰু শৈক্ষিক বিষয়ৰ লেখাৰে বৰঙণি আগবঢ়োৱা ৰাজ্যখনৰ এহেজাৰ গৰাকী যুৱ লেখকলৈ ২৫ হাজাৰ টকাকৈ আৰ্থিক সাহায্য আগবঢ়াব। কালি বিত্তমন্ত্রী অজন্তা নেওগে বাজেট ভাষণত এই বিষয়ে প্ৰকাশ কৰি কয়, যে ৰাজ্য চৰকাৰে চলিত বৰ্ষটো কিতাপৰ বৰ্ষ হিচাপে ঘোষণা কৰিছে। এই অনুসৰি সাহিত্য চৰ্চা আৰু গ্ৰন্থ সংস্কৃতিৰ প্ৰসাৰৰ ক্ষেত্ৰত উৎসাহিত কৰাৰ বাবে এই পদক্ষেপ লোৱা হৈছে বুলি বিত্তমন্ত্ৰীগৰাকীয়ে প্ৰকাশ কৰে। তদুপৰি অসম প্ৰকাশন পৰিষদৰ অনুমোদন মৰ্মে গ্ৰন্থমেলা অনুষ্ঠিত কৰিবলৈ জিলা সদৰৰ বাবে ৫ লাখ টকাকৈ আৰু সমজিলা সদৰ বাবে আঢ়ৈ লাখ টকাকৈ বিত্তীয় সাহায্য আগবঢ়োৱাৰ বাবে বাজেটত প্ৰস্তাৱ দিয়া হৈছে।