আৰক্ষীয়ে কালি গ্ৰেপ্তাৰ কৰা বীৰ লাচিত সেনা নামৰ সংগঠনটোৰ তিনিজন সদস্যক আজি কামৰূপ মহানগৰ জিলাৰ মুখ্য ন্যায়াধীশ দণ্ডাধীশৰ আদালতে তিনিদিনৰ আৰক্ষী জিম্মালৈ প্ৰেৰণ কৰিছে। সংবাদমেলৰ আয়োজন কৰাৰ সময়তে আৰক্ষীয়ে কালি গ্ৰেপ্তাৰ কৰা সংগঠনটোৰ মুখ্য সচিব বল্টু পাণি ফুকন আৰু উৎপল দত্ত, তন্ময় চেতিয়া নামৰ সদস্যকেইজনক আজি আৰক্ষীয়ে আদালতত হাজিৰ কৰোৱাইছিল। উল্লেখযোগ্য যে ধন দাবী আৰু অপহৰণৰ গোচৰত দিছপুৰ আৰক্ষীয়ে ইতিমধ্যে বীৰ লাচিত সেনাৰ ৮ জন সদস্যক গ্ৰেপ্তাৰ কৰাৰ লগতে তেওঁলোকৰ পৰা বহু আপত্তিজনক সামগ্রী উদ্ধাৰ কৰিছিল। ইপিনে বীৰ লাচিত সেনাৰ শিমুলীগুৰি আঞ্চলিকৰ সম্পাদক বিকাশ বুঢ়াগোহাঁইকো আজি আৰক্ষীয়ে গ্ৰেপ্তাৰ কৰিছে। সামাজিক মাধ্যমত দিয়া আপত্তিজনক প’ষ্টৰ বাবে আৰক্ষীয়ে তেওঁক গ্ৰেপ্তাৰ কৰা বুলি জানিব পৰা গৈছে।