ৰাম জনমভূমি মন্দিৰত প্ৰথম দীপাৱলী উৎসৱৰ আয়োজন প্ৰায় সম্পূৰ্ণ হৈ উঠিছে। অযোধ্যাত ২৮ লাখ বন্তি প্ৰজ্বলনেৰে নতুন বিশ্ব অভিলেখ গঢ়াৰ প্ৰস্তুতিও সম্পূৰ্ণ হোৱা বুলি জানিব পৰা গৈছে। ৰাম মন্দিৰ চৌহদত এইবাৰ উদযাপন কৰিবলগীয়া দীপাৱলী উৎসৱ বিশেষভাৱে ব্যতিক্রম হ’ব বুলি প্ৰধানমন্ত্ৰী নৰেন্দ্ৰ মোদীয়ে মন্তব্য কৰিছে। অযোধ্যাত নৱনিৰ্মিত ৰাম মন্দিৰৰ মহাঅভিষেকৰ পাছৰ দীপোৎসৱ ২০২৪ শিৰোনামেৰে উদযাপন কৰিবলগীয়া এই প্ৰথমটো দীপাৱলীৰ বাবে উত্তৰ প্ৰদেশ চৰকাৰে বিশেষ কাৰ্যসূচী ৰূপায়ণ কৰিব। সৰযু নৈৰ পাৰত জ্বলোৱা ২৮ লাখ চাকিৰে ৰাম মন্দিৰ পোহৰাই তোলা হ’ব বুলি প্ৰকাশ কৰা হৈছে। ইপিনে, ২৯ অক্টোবৰৰ পৰা ১ নৱেম্বৰৰ মাজনিশালৈ মন্দিৰ আৰু ভৱন ভক্ত দর্শনাৰ্থীসকলৰ বাবে মুকলি থাকিব বুলি শ্ৰীৰাম জন্মভূমি তীর্থক্ষেত্ৰ পৰিচালনা সমিতিয়ে জানিবলৈ দিছে।