অষ্ট্ৰেলিয়ান অ’পেন টেনিছ প্রতিযোগিতাৰ পুৰুষৰ ডাবলছ শাখাত ভাৰতৰ এন শ্ৰীৰাম বালাজী আৰু তেওঁৰ মেক্সিকোৰ সহযোগী মিগুৱল এঞ্জেল ৰেয়েছ ভাৰেলা দ্বিতীয় ৰাউণ্ডত প্ৰৱেশ কৰিছে। আজি অনুষ্ঠিত প্ৰথম ৰাউণ্ডৰ এখন খেলত বালাজী আৰু ভাৰেলাৰ যুটিয়ে কাজাখস্তানৰ আলেখছাণ্ডাৰ নেডোভিয়েছভ আৰু নেডাৰলেণ্ডছৰ ৰবিন হাছেৰ যুটিক ৬-৪ আৰু ৬-৩ পোনপটীয়া ছেটত পৰাজিত কৰে। এইবাৰৰ অষ্ট্ৰেলিয়ান অ’পেন টেনিছ প্রতিযোগিতাত ভাৰতীয় খেলুৱৈ হিচাপে বালাজীহে প্রতিযোগিতাত বৰ্তি আছে। ইয়াৰ আগতে আজি ভাৰতৰ অনিৰুদ্ধ চন্দ্ৰশেখৰ আৰু পোলেণ্ডৰ কেৰল ড্ৰজেইউস্কিৰ যুটি প্ৰথম ৰাউণ্ডত বছনিয়া, হার্জেগভনিয়াৰ ডামিৰ ঝুমহুৰ আৰু গ্ৰীচৰ পেট্ৰছ চিটছিপাছৰ যুটিৰ হাতত পৰাজিত হৈ প্ৰথম ৰাউণ্ডৰ পৰাই বিদায় লৈছে। পুৰুষৰ ছিংগলছত শীর্ষ বাছনিৰ নভাক জ’ক’ভিছ, কার্লোছ আলকাৰ’জ আৰু মহিলাৰ শাখাত আৰিয়ানা ছাবালেংকা সহজ খেলত জয়ী হৈ দ্বিতীয় ৰাউণ্ডলৈ অগ্ৰসৰ হৈছে।