মুখ্যমন্ত্ৰী ড০ হিমন্ত বিশ্ব শৰ্মাৰ ধুবুৰী ভ্ৰমণৰ পাছতে ৰাজ্য চৰকাৰে ফিল্ড অপাৰেচন আৰু পৰিচালনাৰ সুবিধা তথা জনহিতার্থে অসম আৰক্ষীৰ ধুবুৰী, হাইলাকান্দি আৰু অপৰাধ অনুসন্ধান শাখাৰ জ্যেষ্ঠ আৰক্ষী অধীক্ষক পদত কিছু সালসলনি কৰিছে। সেই অনুসৰি হাইলাকান্দিৰ জ্যেষ্ঠ আৰক্ষী অধীক্ষক লীনা দলে অতি সোনকালে ধুবুৰীৰ জ্যেষ্ঠ আৰক্ষী অধীক্ষকৰ দায়িত্ব গ্ৰহণ কৰিবলৈ নিৰ্দেশ দিয়া হৈছে। উল্লেখযোগ্য যে, ধুবুৰী চহৰৰ আইন-শৃংখলা আৰু সাম্প্ৰদায়িক সম্প্রীতি অটুট ৰখাৰ বাবে কঠোৰ ব্যৱস্থা গ্ৰহণ কৰিবলৈ মুখ্যমন্ত্রীয়ে জিলা প্ৰশাসনক নির্দেশ দিছে। ধুবুৰীৰ আৱৰ্ত ভৱনত কালি জিলা প্ৰশাসনৰ উচ্চ পদস্থ বিষয়াসকলৰ সৈতে এখন পর্যালোচনা বৈঠকত অংশ লৈ মুখ্যমন্ত্ৰীয়ে সন্ধিয়া আৰু নিশাৰ ভাগত দুষ্কৃতিকাৰীক দেখা মাত্ৰকে গুলীওৱাৰ আনুষ্ঠানিক নিৰ্দেশ জাৰি কৰে। ধুবুৰীলৈ শীঘ্ৰে ৰেপিড একচন ফোৰ্চ আৰু কেন্দ্ৰীয় সংৰক্ষিত বাহিনীৰ অতিৰিক্ত বেটেলিয়ান পঠিওৱা হ’ব বুলিও মুখ্যমন্ত্ৰীয়ে প্ৰকাশ কৰে।