গুজৰাটৰ আহমেদাবাদত আজিৰে পৰা আৰম্ভ হোৱা কমনৱেলথ ভাৰোত্তোলন প্রতিযোগিতাৰ যুৱ শাখাত ৰাজ্যৰ প্ৰতিভাৱান ভাৰোত্তোলক ধৰ্মজ্যোতি দেউঘৰীয়াই সোণৰ পদক অৰ্জন কৰিছে। যুৱ শাখাৰ ৫৬ কিলোগ্রাম শিতানত ধৰ্মজ্যোতিয়ে স্নেটচত ৯৭ কিলোগ্ৰাম আৰু ক্লিন এণ্ড জাৰ্কত ১২৭ কিলোগ্ৰামেৰে মুঠ ২২৪ কিলোগ্ৰাম ভাৰোত্তোলন কৰি সোণৰ পদক লাভ কৰে। নিজৰ খেলুৱৈ জীৱনৰ প্ৰথমখন কমনৱেলথ প্রতিযোগিতাতে স্বর্ণ জয় কৰি ধৰ্মজ্যোতিয়ে অনৱদ্য সফলতা অৰ্জন কৰিলে। তেওঁ লগতে স্নেটচ শিতানত প্ৰতিযোগিতাখনৰ নতুন অভিলেখো গঢ়ে। ধৰ্মজ্যোতিৰ এই গৌৰৱময় সাফল্যৰ বাবে অসম ভাৰোত্তোলন সন্থাৰ সভাপতি তথা কেন্দ্ৰীয় মন্ত্রী সর্বানন্দ সোণোৱালে খেলুৱৈগৰাকীক শুভেচ্ছা জনাইছে। এইবাৰৰ প্ৰতিযোগিতাৰ ধৰ্মজ্যোতিৰ উপৰিও আন চাৰিগৰাকী ভাৰোত্তোলক ভাৱনা গগৈ, হেমন্ত দৈমাৰী, অভিনৱ গগৈ আৰু বেব্ৰত ভৰালীয়েও দেশৰ হৈ প্ৰতিদ্বন্দ্বিতা আগবঢ়াব।