বৰপেটা জিলাৰ চেঙাত ঘন কুঁৱলীৰ বাবে হোৱা এটা পথ দুৰ্ঘটনাত এজন মটৰচাইকেল আৰোহীৰ মৃত্যু হয়। বিশেষ সূত্ৰৰ পৰা জানিব পৰা মতে বৰমাৰা গাঁৱৰ নুৰ মহম্মদ নামৰ মটৰ চাইকেল আৰোহীজনে নিয়ন্ত্ৰণ হেৰুৱাই পথৰ কাষত ৰৈ থকা এখন ট্ৰাকত খুন্দা মৰাৰ ফলত এই শোকাবহ দুর্ঘটনাটো সংঘটিত হয়। ঘটনাস্থলীত তাৰাবাৰী আৰক্ষী উপস্থিত হৈ তদন্ত আৰম্ভ কৰিছে।
আনহাতে, কার্বি আংলং জিলাৰ বোকাজানৰ শুকানজানত কালি নিশা ৩৯ নম্বৰ ৰাষ্ট্ৰীয় ঘাইপথত সংঘটিত এটা পথ দুৰ্ঘটনাত এজন যুৱকৰ মৃত্যু হয়। জানিব পৰা মতে ডিমাপুৰৰ দিশৰ পৰা গোলাঘাটৰ দিশে গৈ থকা এখন ১৬ চকীয়া ট্রাকে পথৰ কাষত ৰৈ থকা জয়ৰাম গুপ্তা নামৰ এজন যুৱকক মহটিয়াই নিয়ে আৰু বিপৰীত দিশৰ পৰা অহা এখন বাহনত খুন্দা মৰাৰ ফলত যুৱকজনৰ থিতাতে মৃত্যু হয়। এই দুৰ্ঘটনাত আনখন বাহনৰ চালক মংগল আৰু জাউচ টিগা নামৰ আন দুজন লোক গুৰুতৰভাৱে আহত হয়। আৰক্ষীয়ে দুৰ্ঘটনা সংঘটিত কৰা ট্রাকখনৰ চালকজনক আটক কৰাৰ লগতে দুর্ঘটনা সন্দৰ্ভত তদন্ত অব্যাহত ৰাখিছে।
