গুৱাহাটীৰ বৰ্ষাপাৰাত থকা অসম ক্রিকেট এছ’চিয়েছনৰ ষ্টেডিয়ামত কাইলৈৰ পৰা ভাৰত আৰু দক্ষিণ আফ্ৰিকাৰ মাজৰ চলিত টেষ্ট শৃংখলাৰ দ্বিতীয়খন টেষ্ট অনুষ্ঠিত হ’ব। অসম ক্ৰিকেটৰ ৭৬ বছৰীয়া ইতিহাসত ৰাজ্যখনত হ’বলগীয়া প্ৰথমখন টেষ্টৰ বাবে বি চি চি আই তথা অসম ক্রিকেট সন্থাই প্রস্তুতি সম্পূৰ্ণ কৰিছে। আজি দুয়োটা দলৰ অধিনায়কে কাইলৈৰ খেল সম্পর্কে সাংবাদিকক সম্বোধন কৰে। আঘাতৰ বাবে দ্বিতীয় টেষ্টৰ পৰা বাদ পৰা ভাৰতীয় দলৰ অধিনায়ক শুভমন গীলৰ স্থানত ঋষভ পণ্টক দলৰ নেতৃত্বৰ দায়িত্ব দিয়া হৈছে। আজিৰ সংবাদমেলতে ঋষভ পণ্টক দিয়া অধিনায়কৰ দায়িত্বৰ কথা আনুষ্ঠানিকভাৱে ঘোষণা কৰা হয়। সাংবাদিকক সম্বোধন কৰি ঋষভ পণ্টে কয়, যে তেওঁৰ ২০১৮ চনত গুৱাহাটীতে ৱেষ্ট ইণ্ডিজৰ বিৰুদ্ধে এদিনীয়া আন্তঃৰাষ্ট্ৰীয় ক্রিকেটত অভিষেক ঘটিছিল। গুৱাহাটীতে তেওঁ টেষ্ট ক্ৰিকেটৰ অধিনায়ক হিচাপে অভিষেক ঘটিব। গুৱাহাটী টেষ্টৰ বাবে বৰ্তমানলৈ ২০ হাজাৰতকৈও অধিক টিকট বিক্ৰী হোৱা বুলি অসম ক্রিকেট সংস্থাই জানিবলৈ দিছে।