ড° ভূপেন হাজৰিকাৰ জন্ম শতবার্ষিকী উপলক্ষে সদৌ অসম ছাত্ৰ সন্থাই বছৰজোৰা বিভিন্ন কাৰ্যসূচী আয়োজনৰ সিদ্ধান্ত লৈছে। গুৱাহাটীত অনুষ্ঠিত সদৌ অসম ছাত্ৰ সন্থাৰ ৰাজ্যিক কাৰ্যনিৰ্বাহকৰ সভাত কালি এই সন্দৰ্ভত পৰিকল্পনা যুগুত কৰা হয়। ছাত্ৰ সন্থাই ইয়াৰে কেতবোৰ কাৰ্যসূচী ড° ভূপেন হাজৰিকা সাংস্কৃতিক ন্যাসৰ সৈতে যৌথভাৱে ৰূপায়ণ কৰিব। এই উপলক্ষে আজি শ্বহীদ ন্যাসত আয়োজিত এখন সংবাদমেলত মুখ্য উপদেষ্টা সমুজ্জ্বল কুমাৰ ভট্টাচাৰ্যৰ উপস্থিতিত সভাপতি উৎপল শর্মা আৰু সাধাৰণ সম্পাদক সমীৰণ ফুকনে তেওঁলোকৰ কাৰ্যসূচী সম্পৰ্কে অৱগত কৰে। এই অনুসৰি ৮ ছেপ্তেম্বৰত ৰাজ্যৰ প্ৰতিখন জিলাৰ সদৰত জিলা ছাত্ৰ সন্থাসমূহে পুৱা শ্ৰদ্ধাঞ্জলি অনুষ্ঠানৰ আয়োজন কৰিব। এই অনুষ্ঠানত ১০০ গৰাকী ছাত্ৰ-ছাত্ৰী, যুৱক- যুৱতী, শিল্পীকে ধৰি অন্যান্য লোকসকলে মানুহে মানুহৰ বাবে গীতটি পৰিৱেশন কৰি শিল্পীগৰাকীলৈ শ্ৰদ্ধাঞ্জলি জনাব। সন্ধিয়াৰ ভাগত আঞ্চলিক ছাত্ৰ সন্থাই নিজ নিজ অঞ্চলত ৰাইজৰ সহযোগত বন্তি প্ৰজ্বলন কৰিব। প্ৰতিবছৰৰ দৰে এইবাৰো দীঘলীপুখুৰীৰ পাৰত ড° ভূপেন হাজৰিকাৰ প্ৰতিমূৰ্তিস্থলীত সন্ধিয়া উদ্দীপনা শীৰ্ষক অনুষ্ঠানৰ আয়োজন কৰা হ’ব। এই অনুষ্ঠানত প্ৰতিখন জিলাৰ একোখন নিৰ্বাচিত মহাবিদ্যালয়ৰ শ্ৰেষ্ঠ কণ্ঠশিল্পী, বিশ্ববিদ্যালয় আৰু যুৱ মহোৎসৱৰ শ্ৰেষ্ঠ কণ্ঠশিল্পী তথা গুৱাহাটী মহানগৰীৰ কেইবাখনো মহাবিদ্যালয়ৰ শ্ৰেষ্ঠ কণ্ঠশিল্পীসকলে ড° ভূপেন হাজৰিকাৰ গীত পৰিৱেশন কৰিব। ছাত্ৰ সন্থাই শিল্পীগৰাকীৰ জন্ম শতবার্ষিকীৰ লগত সংগতি ৰাখি এখন স্মাৰক গ্ৰন্থও প্ৰকাশ কৰিব বুলি আজিৰ সংবাদমেলতে উল্লেখ কৰে।
Site Admin | August 27, 2025 6:54 PM | Bhupen hazarika
বছৰজোৰাকে ড° ভূপেন হাজৰিকাৰ জন্ম শতবার্ষিকী আয়োজনৰ সিদ্ধান্ত সদৌ অসম ছাত্ৰ সন্থাৰ
