● ৰাজ্য চৰকাৰে পৰৱৰ্তী বৰ্ষত কৃষকৰ পৰা ১০ লাখ মেট্রিকটন ধান ক্রয় কৰিব বুলি মুখ্যমন্ত্রী ড০ হিমন্ত বিশ্ব শৰ্মাই প্ৰকাশ কৰিছে। মৰাণত কালি সাংবাদিকৰ সৈতে হোৱা কথা বতৰাত মুখ্যমন্ত্ৰীগৰাকীয়ে কয়, যে চৰকাৰে ধান ক্ৰয়ৰ পৰিমাণ প্ৰতিবছৰ বৃদ্ধি কৰি গৈছে। বিগত বৰ্ষত ৰাজ্য চৰকাৰে কৃষকৰ পৰা প্ৰায় ৮ লাখ ৫০ হাজাৰ মেট্রিকটন ধান ক্ৰয় কৰিছে। উল্লেখযোগ্য যে ৰাজ্য চৰকাৰে চলিত বৰ্ষত কৃষকৰ সহায় হোৱাকৈ প্ৰতি কুইণ্টল ধান আৰু সৰিয়হৰ বাবে ন্যূনতম সমর্থন মূল্যতকৈ অতিৰিক্ত আর্থিক বোনাচ প্ৰদান কৰাৰ কথা ঘোষণা কৰিছে। মন্ত্ৰীসভাৰ বৈঠকত প্রতি কুইণ্টল ধানৰ বাবে ২৫০ টকা প্ৰতি কুইণ্টল সৰিয়হৰ বিপৰীতে ৫০০ টকাকৈ বোনাচ প্ৰদান কৰা সিদ্ধান্ত গ্ৰহণ কৰা হৈছিল। ৰাজ্যিক কেবিনেটৰ এই সিদ্ধান্তৰ ফলত প্ৰতি কুইণ্টল ধানত কৃষকে ২ হাজাৰ ৫৫০ টকা আৰু প্ৰতি কুইণ্টল সৰিয়হত ৬ হাজাৰ ৪৫০ টকাকৈ লাভ কৰিব।