● পঞ্চদশ অসম বিধানসভাৰ চলিত অধিবেশনৰ আজি অন্তিম দিনা সদনত ভৈয়াম জনজাতি পৰিক্ৰমা দপ্তৰৰ মন্ত্ৰী ডাঃ ৰণোজ পেগুৱে ৰাজ্যৰ ৬ জনগোষ্ঠীৰ জনজাতিকৰণ সম্পৰ্কীয় মন্ত্ৰী গোটৰ প্ৰতিবেদন দাখিল কৰে। এই প্ৰতিবেদনক লৈ বিৰোধী পক্ষই আলোচনা হোৱাটো বিচাৰিছিল যদিও বিধানসভাৰ অধ্যক্ষ বিশ্বজিৎ দৈমাৰীয়ে অনুমতি প্ৰদান নকৰে আৰু সদন অনিৰ্দিষ্ট কাললৈ স্থগিত বুলি ঘোষণা কৰে৷
প্রতিবেদন অনুসৰি অসমৰ জনজাতিসকলক ৩ টা ভাগত বিভক্ত কৰা হয়। আগৰে পৰা থকা ভৈয়াম জনজাতি আৰু পাৰ্বত্য জনজাতিৰ লগত উপত্যকা জনজাতি সংযোগ কৰা হৈছে। সেই অনুসৰি ছয় জনগোষ্ঠীৰ অবিভক্ত গোৱালপাৰা জিলাৰ কোচ ৰাজবংশীসকল, মৰাণ, আৰু মটকসকলৰ ভৈয়াম জনজাতি হিচাপে স্বীকৃতি দিয়াৰ প্ৰস্তাৱ দিয়া হয়। আনহাতে, আহোম, চুতীয়া, আদিবাসী চাহ জনগোষ্ঠী আৰু অবিভক্ত গোৱালপাৰা জিলাৰ বাহিৰৰ কোচ ৰাজবংশীসকলক উপত্যকা জনজাতি হিচাপে স্বীকৃতি দিয়াৰ মন্ত্ৰীগোটে প্ৰস্তাৱ দিয়ে।
উল্লেখযোগ্য যে, ৰাজ্যত ৬টা জনগোষ্ঠীৰ জনজাতিকৰণৰ প্ৰসংগত গঠন কৰা মন্ত্ৰী গোটে বুধবাৰে ৰাজ্যিক মন্ত্রীসভাত প্রতিবেদন দাখিল কৰিছিল। মন্ত্ৰীসভাৰ বৈঠকৰ অন্তত মুখ্যমন্ত্রীয়ে এই প্রতিবেদনখনক মন্ত্রীসভাই অনুমোদন দিছে বুলি সংবাদমেলক অৱগত কৰিছিল। এই প্রতিবেদনে বৰ্তমানৰ জনজাতিসকলৰ অধিকাৰ আৰু সাংবিধানিক সুৰক্ষাৰ ক্ষেত্ৰত কোনো অসুবিধাৰ সৃষ্টি নকৰাকৈ অন্যান্য জনগোষ্ঠীসমূহৰ আশা- আকাংক্ষাক প্ৰতিনিধিত্ব কৰিব পাৰিব বুলি ড° শৰ্মাই উল্লেখ কৰিছিল।
