ৰাজ্যত কালি ঘোষিত এ ডি আৰ ইৰ চতুৰ্থ বৰ্গৰ পদৰ নিযুক্তি পৰীক্ষাৰ ফলাফল অনুসৰি ১৩ লাখ ৯৯ হাজাৰ ৮৯৮ গৰাকী প্ৰাৰ্থীৰ ভিতৰত ৫ হাজাৰ ২৩ গৰাকী প্ৰাৰ্থী উত্তীৰ্ণ হৈছে। খানাপাৰাৰ অসম প্ৰশাসনীয় পদাধিকাৰী মহাবিদ্যালয়ত এখন সংবাদমেলত ৰাজ্যিক পৰ্যায়ৰ নিযুক্তি আয়োগৰ অধ্যক্ষ ড° বি কল্যাণ চক্ৰৱৰ্তীয়ে এই বিষয়ে প্ৰকাশ কৰে। তেওঁ কয়, যে ৪১টা বিভাগত প্রয়োজনীয় এই পদসমূহৰ বাবে যোৱা বছৰৰ ২৭ অক্টোবৰত লিখিত পৰীক্ষা অনুষ্ঠিত হৈছিল। লিখিত পৰীক্ষাত অৱতীৰ্ণ মুঠ প্ৰাৰ্থীৰ ভিতৰত ৯ হাজাৰ ৭৬২ গৰাকীক মৌখিক পৰীক্ষাৰ বাবে বাছনি কৰা হৈছিল। মৌখিক পৰীক্ষাত বাছনি লাভ কৰা ৫ হাজাৰ ২৩ গৰাকী প্ৰাৰ্থীৰ ভিতৰত হাইস্কুল শিক্ষান্ত পৰীক্ষাত উত্তীৰ্ণ এহেজাৰ ৮৭ গৰাকী আৰু আই টি আই উত্তীৰ্ণ এহেজাৰ ৮৩৩ গৰাকী প্ৰাৰ্থী আছে বুলি তেওঁ প্ৰকাশ কৰে।