এন ডি এফ বিৰ প্ৰাক্তন সদস্যৰ বিৰুদ্ধে চলি থকা গোচৰ প্ৰত্যাহাৰ প্ৰক্ৰিয়াৰ অংশ হিচাপে ৩৫ জন এন ডি এফ বিৰ সদস্যক আজি গুৱাহাটী কেন্দ্ৰীয় কাৰাগাৰৰ পৰা কোকৰাঝাৰ জিলা আৰু ছেছন আদালতলৈ অনা হয়। চিবিআই আৰু এন আই এ-ৰ বিশেষ আদালতত বিচৰাধীন গোচৰ সংশ্লিষ্ট জিলা আৰু ছেছন আদালতলৈ স্থানান্তৰ কৰাৰ সিদ্ধান্ত অনুযায়ী এই বিচৰাধীন এন ডি এফ বিৰ সদস্যকেইজনক কোকৰাঝাৰৰ আদালতত হাজিৰ কৰোৱা হয়। আমাৰ কোকৰাঝাৰৰ সংবাদদাতা প্রীতম ব্ৰহ্ম চৌধুৰীয়ে জনোৱা অনুসৰি ২০২০ চনৰ বড়ো শান্তি চুক্তিৰ চৰ্ত অনুযায়ী প্রাক্তন এন ডি এফ বিৰ সদস্যসকলৰ বিৰুদ্ধে থকা গোচৰসমূহৰ আইনী নিষ্পত্তিৰ বাবে অসম চৰকাৰ, কেন্দ্ৰ চৰকাৰ আৰু বিটিচি প্ৰশাসনৰ ত্ৰিপাক্ষিক প্ৰচেষ্টাৰ অংশ হিচাপে গোচৰসমূহ এইদৰে জিলা আৰু ছেছন আদালতলৈ স্থানান্তৰিত কৰা হৈছে।