পঞ্চদশ অসম বিধানসভাৰ শীতকালীন অধিবেশনৰ কালি সামৰণি পৰে। এই অধিবেশনত ন-পুৰণি মুঠ ৩৩ খন বিধেয়ক গৃহীত হয়। কালি অন্তিম দিনা শিক্ষা বিভাগৰ ৬ খন বিধেয়ককে ধৰি মুঠ ১১ খন বিধেয়ক গৃহীত হয়। ইয়াৰ ভিতৰত শিক্ষক-শিক্ষয়িত্ৰীৰ সেৱা প্ৰাদেশিকীকৰণ আৰু শৈক্ষিক প্ৰতিষ্ঠানৰ পুনৰ গঠন সংশোধনী বিধেয়ক ২০২৫, অসম বেচৰকাৰী শৈক্ষিক প্ৰতিষ্ঠানৰ মাচুল নিয়ন্ত্রণ সংশোধনী বিধেয়ক ২০২৫ আৰু শিক্ষকৰ নিয়োগ আৰু বদলিকৰণ বিধেয়কো আছে। এই সন্দৰ্ভত শিক্ষামন্ত্রী ডা০ ৰণোজ পেগুৱে কয়, যে ৰাজ্যৰ অপ্ৰাদেশিকীকৃত শিক্ষানুষ্ঠানসমূহত কৰ্মৰত শিক্ষক-কর্মচাৰীৰ পদ প্ৰাদেশিকীকৰণৰ সমস্যা সমাধানৰ বাবে ২০১৭ চনৰ প্ৰাদেশিকীকৰণ আইনৰ চৰ্তসমূহ শিথিল কৰা হৈছে। ২০০৬ চনৰ ১ জানুৱাৰীৰ পূৰ্বে ৰাজ্যত স্থাপন হোৱা শিক্ষানুষ্ঠানসমূহৰ শিক্ষক-কর্মচাৰীৰ পদ প্ৰাদেশিকীকৰণ হ’ব বুলি তেওঁ উল্লেখ কৰে। শিক্ষক-কর্মচাৰীৰ পদ প্ৰাদেশিকীকৰণ নিশ্চিতকৰণৰ বাবে যোগদানৰ ভিত্তিবৰ্ষ সংশোধনীৰ চিন্তা-চৰ্চা কৰা বুলিও মন্ত্ৰীগৰাকীয়ে প্ৰকাশ কৰে। অহা বছৰৰ ফেব্ৰুৱাৰীত হ’বলগীয়া বিধানসভাৰ অধিবেশনত এই সন্দৰ্ভত বিধেয়কখন পুনৰ সংশোধনৰ প্ৰচেষ্টা চলোৱা হ’ব বুলিও মন্ত্ৰীগৰাকীয়ে লগতে উল্লেখ কৰে। মাচুল নিয়ন্ত্ৰণ প্ৰাধিকৰণে এতিয়াৰে পৰা ৰাজ্যৰ খ্ৰীষ্টিয়ান মিছনেৰী সকলক তেওঁ সামৰি ল’ব বুলি প্ৰকাশ কৰে। সংশোধনীৰ জৰিয়তে গাঁও পঞ্চায়ত এলেকাৰ অধীনৰ সকলো ব্যক্তিগত খণ্ডৰ বিদ্যালয়ৰ মাচুলৰ ঊৰ্ধসীমা ২৫ শতাংশকৈ হ্ৰাস পাব বুলিও মন্ত্ৰীগৰাকীয়ে সদনক অৱগত কৰে। ৰাজ্যৰ জনজাতীয় খণ্ড আৰু বেষ্টনীৰ অধীনৰ ভূমি সমস্যা সমাধানৰ বাবে ১১ খন জিলাত ভূমি ন্যায়াধীকৰণ স্থাপন কৰাৰ বাবেও কালি সিদ্ধান্ত লোৱা হয়। সদনত কালি ৰাজহ আৰু দুর্যোগ ব্যবস্থাপনা মন্ত্রী কেশৱ মহন্তই এই বিষয়ে সদৰি কৰে। সদনত অসম জিলা ভূমি ন্যায়াধীকৰণ বিধেয়ক ২০২৫ গৃহীতকৰণৰ পূৰ্বে বিৰোধীৰ দলৰ বিধায়কসকলৰ সংশোধনী প্রস্তাৱৰ উত্তৰত মন্ত্ৰীগৰাকীয়ে এই বিষয়ে প্রকাশ কৰে। সংসদীয় পৰিক্ৰমা মন্ত্রী চন্দ্রমোহন পাটোৱাৰীয়ে সদনত কালি ২০২৩-২৪ বিত্তীয় বৰ্ষৰ দেশৰ নিয়ন্ত্রক আৰু মহালেখা পৰীক্ষকৰ প্ৰতিবেদনসমূহ দাখিল কৰে। ইয়াৰ পাছতে অধ্যক্ষ বিশ্বজিৎ দৈমাৰীয়ে সদনৰ কাম-কাজ অনির্দিষ্টকাললৈ স্থগিত ঘোষণা কৰে।